950 отбасының сауабын алды

Қазақстан мұсылмандары діни басқармасының 35 жылдық мерейтойы қарсаңында Бас мүфти Наурызбай қажы Тағанұлының бастамасымен «Рамазан сыйы» қайырымдылық марафоны басталды. Игі шараға жоғарыда аталған ұйымның облыстағы өкілдігі де белсенді атсалысып, 950 отбасына қуаныш сыйлады.

Мүмкіндігі шектеулі, көпбалалы, жалғызбасты ана, аз қамтылған, т.б. санаттағы отбасыларға 19 тоннаға жуық азық-түлік себеті таратылды. Сауабы мол шараға Ақтөбе өкілдігіне қарасты қала және аудан, ауыл мешіттері тонның ішкі бауындай үлес қосты.

Облыстың бас имамы Амантай Садиев 950 отбасыны Рамазан айымен құттықтай келе: «Сынаққа сынбай, сабыр етсеңіздер, Жаратқанның пендесіне берер сыйы мол», — деп, қасиетті айда ізгі шарада демеушілік танытқан дін жанашырларының кәсібіне береке тіледі.

Қайырымдылық айында бастау алған бұл жоба жыл бойы жалғасын табады. Жоспарбойынша 35 мың отбасыны қамту көзделген.

Жалпы, діни басқарманың 35 жылдығына және Рамазан айының құрметіне орай ұйымдастырылған қайырымдылық марафонында бүгінге дейін еліміз бойынша 3500 отбасына қажетті азық-түлік себеттері үлестірілді.

Айбек СЕРІКҰЛЫ.