Артық болмас білгенің…
Семинар
Облыстық «Анаға тағзым» орталығында отбасын қолдау орталықтарының мамандарына арналған супервизия басталды. Үш күнге жоспарланған семинар әлеуметтік жұмыстағы кейс-менеджмент технологиялары негізінде ұйымдастырылған. Семинар-практикада БҰҰ Балалар қоры (ЮНИСЕФ) және «Отбасы академиясы» қоғамдық қорының өкілдері Назира Оспанбек, Татьяна Тағанова тәжірибелерімен бөлісіп, дәріс өткізуде.
«Отбасылармен жұмыстағы кейс-менеджмент» тақырыбында өтіп жатқан семинарға облыстық жұмыспен қамтуды үйлестіру және әлеуметтік бағдарламалар басқармасының басшысы Ләззат Оразбаева қатысты.
Басқарма басшысының айтуынша, аталған семинар өмірлік қиын жағдайға тап болған адамдарды қолдау мақсатында ұйымдастырылған.
— Өңірде 14 отбасын қолдау орталығы бар. Бүгінгі семинарға осы орталықтардың басшылары мен мамандары, әлеуметтік қызметкерлер мен психологтар қатысып жатыр. Жалпы, бұл жобаның мақсаты — отбасын қолдау орталықтарының әлеуетін нығайту. Семинарда әр отбасы мен баланың бірегей қажеттіліктеріне бейімделген кешенді қолдауды қамтамасыз етуге бағытталған жаңа тәжірибелер көрсетіледі. Сондай-ақ қатысушылар отбасын қолдау орталығына түскен өтініштерді кешенді бағалап, көмек көрсетудің жеке жоспарын жасаудың жаңа әдісін меңгереді, — деді Л.Оразбаева.
«Отбасына жәрдем көрсетудің негізі — маманды бір отбасына бекіту», — дейді дәріс тренері. Бұл отбасына көмек пен қолдаудың барлық бағытында жол көрсетуге, басқа мамандардың жұмысын үйлестіруге мүмкіндік береді.
— Семинар барысында отбасымен жұмыс істегенде назар аудару қажет мәселелер, әсіресе кейс-менеджмент әдісін қолдану арқылы отбасының мықты тұстарын анықтап, олардың ресурстарын бағалау тұстары пысықталады. Сонымен қатар отбасы мүшелерінің психоэмоционалды жай-күйін реттеу, рухани тұрғыдан мықты ету және отбасының дағдарыстан шығуына көмектесу жолдарын қарастырамыз. Әрбір отбасының дағдарысқа түсу себептерін талдап, оларды жеңу үшін қандай теориялар мен әдістер қолдану керектігі айтылады. Семинар барысында әлеуметтік қызметкерлердің жіберетін қателіктеріне де талдау жасалады, — деді тренер Назира Оспанбек.
А.НАҒАШЫБАЙҚЫЗЫ.
