«Наурыз жұмыскер» бағдарламасы бойынша өтінімдер қабылдау басталды

Жұмысшы жылы

17 наурызда елімізде Жұмысшы мамандықтары жылына орай жаңадан ашылған «Наурыз жұмыскер» бағдарламасы бойынша өтінімдер қабылдау басталды. 

Бұл бағдарлама мыңдаған жұмысшы азаматтарға қолжетімді шарттармен баспана сатып алуға мүмкіндік береді. Ол үшін биыл «Отбасы банк» АҚ 72 млрд теңге қаржы бөледі.

— Президент Қасым-Жомарт Тоқаев осы жылды «Жұмысшы мамандықтары жылы» деп атады. Бұл — еңбек адамдарын нақты қолдау. Осы ретте «Отбасы» банк «Наурыз жұмыскер» жаңа бағытын іске қосып отыр. Мақсат — жұмысшы мамандықтарының өкілдерін қолдау. Осы ретте банк бөлген қаржы есебінен

2 440-қа жуық еңбек адамы баспаналы болмақ, — дейді «Отбасы банк» АҚ Басқарма төрағасы Ләззат Ибрагимова.

Ләззат Ибрагимованың айтуынша, «Наурыз жұмыскер» — «Наурыз» бағдарламасының бір бағыты. Сондықтан екі бағдарламаның шарттары бірдей. Яғни қарыз бойынша мөлшерлеме азаматтардың әлеуметтік осал санаттары үшін —  жылдық 7% және қалған барлық санаттар үшін — жылдық 9%.

Биылдан бастап «Наурыз» бағдарламасына қатысушылар үшін тағы бір жақсы жаңалық — баспана алғысы келетіндер әрленген жаңа тұрғын үйді таңдаса, бастапқы жарна 10%-дан басталады. Егер жаңа тұрғын үй әрлеусіз болса, онда бастапқы жарна 20%-дан басталады.

— Бұл бағдарлама бойынша өңірлерден құны 30 миллион теңгеге дейінгі, Алматы мен Астана қаласынан құны 36 миллион теңгеге дейінгі пәтерлерді алуға болады.

Мегаполистер мен облыс орталықтарында «Баспана маркет» (otbasybank.kz) порталы арқылы ғана бастапқы тұрғын үй сатып алуға болады. Қайталама тұрғын үйді моноқалалар мен ауылдық елдімекендерде сатып алуға болады. Клиенттер үшін өтінім берген кезде отбасы банкіндегі шотта кемінде 2 миллион теңге болуы керек, — дейді Ләззат Ибрагимова.

«Наурыз жұмыскер» бағдарламасынаауыл шаруашылығы, тау-кен және өңдеу өнеркәсібі, энергетика, сумен жабдықтау, құрылыс, көлік және қоймалау салаларының қызметкерлері қатыса алады. Мамандықтар мен қызмет түрлерінің толық тізімін банктің сайтынан көруге болады. Өтініш берушінің соңғы 6 айда ресми кірісі болуы керек, ал қазіргі жұмыс берушінің міндетті зейнетақы жарналары соңғы 3 айда тұрақты болуы керек. «Наурыз жұмыскер» бағытының «Наурыз» бағдарламасынан ерекшелігі —  конкурс және балл санау жүргізілмейді. Қолжетімді қарыздарды банк филиалдарына бірінші болып жүгінетіндер және төлем қабілеттілігінен өтетіндер алады.

Аталған бағдарламаға қатысу үшін жалақы мөлшері шегі қанша болуы керектігі маңызды емес. Егер төлем қабілеттілігін растауға қажетті табысы жеткіліксіз болса, онда ол 2 қосымша қарыз алушыны тарта алады. Бұл жақын туыстар болуы міндетті емес, әріптестер де көмектесе алады.

М.ТАБЫН.