Басты бет » Спорт » Саматбек — әлем чемпионы!

Саматбек — әлем чемпионы!

Ақтөбелік өрен Саматбек Ізімғали грек-рим күресі бойынша кадеттер арасында әлем чемпионы атанды.

Күрес түрлері бойынша кадеттер арасындағы әлем чемпионаты 29 шілде-4 тамыз аралығында Болгария астанасы София қаласында өтті. Саматбек 45 кг салмақ дәрежесінде өнер көрсетті.

Грек-рим күресі бойынша облыстық жасөспірімдер құрамасының аға бапкері Қайырбек Беріков:

— Саматбек Софиядағы жеңісінен бір ай бұрын, шілде айының басында Нұр-Сұлтан қаласында өткен Азия чемпионатында да жеңімпаз атанған еді. Ал әлем чемпионатында ол финалға дейін үш белдесу өткізіп, үшеуінде де қарсыласын айқын басымдықпен ұтты. Олардың алғашқысы — Еуропа чемпионы атанған әзірбайжандық Фарид Садихли. Финалдық белдесуде Саматбек өзбекстандық Асадбек Бахромовты таза жеңді, — деді.

Саматбек спорттағы жолын Ақтөбедегі №4 облыстық мамандандырылған балалар-жасөспірімдер олимпиада резервінің мектебінде бастаған. Спорттағы алғашқы ұстазы — Айбек Пұсырманов.

Қазіргі күні ол Алматы қаласында жаттығып жүр. Бапкері — Жарқын Тұрсынов.

— Саматбектің жеңісі біз үшін үлкен мақтаныш. Тағы бір ақтөбелік жас спортшы  Ерасыл Кенғанов та Азия чемпионатында қола жүлде алған болатын. Мейрамбек Айнағұловтың жолын жалғап жүрген осындай өрендеріміз бар, — дейді Қайырбек Беріков.

Айта кетелік, грек-рим күресінің шебері, ұлттық құрама мүшесі Мейрамбек Айнағұлов бұдан сегіз жыл бұрын кадеттер арасында әлем чемпионы атанған еді.

Индира ЖАЙМАҒАМБЕТОВА.

Пікір жазу

Your email address will not be published. Толтырылуы міндетті жерлер белгіленген *

*