Семинарға келіңіз
Сәуірдің 27-29-ында Ақтөбеде аутизм дертіне шалдыққан балаларды қолдау мақсатында семинар өтеді.
Израиль әлем бойынша медицинасы дамыған он елдің қатарына кіреді.
— Сол себепті, аталған елдің елшілігімен келіссөздер жүргізіп, меншік нысанына қарамастан медицина мекемелерінің қызметкерлеріне (логопед, психолог, невропатологтар) арналған семинар өткізуді жоспарлап отырмыз, — дейді қалалық кәсіпкерлік бөлімінің басшысы Анар Даржанова.
Семинардың екінші, үшінші күндері аутизмге шалдыққан балалардың ата-аналарына арнайы кеңестер беріледі.
— Аутизм — ми қызметінің бұзылуы салдарынан туатын ауру. Ауру ерте бастан анықталса, нәтижелі болады. Өкінішке қарай, аутизмді дер уақытында анықтауда дәрігерлердің біліктілігі, білім деңгейі төмен. Аутизмге шалдыққан балалармен ата-аналар жұмыс істеудің әдіс-тәсілін білмейді. Мұның бәрі семинарда жан-жақты түсіндірілетін болады,— дейді Анар Даржанова.
2 сәуір — Бүкіләлемдік аутизм мәселесі туралы ақпарат тарату күні.
— Дегенмен, бұл күні Ақтөбеде ел-жұртты елең еткізерліктей шаралар ұйымдастырылған жоқ. Бұл ауруға қоғамның назарын аударуымыз қажет, — дейді қалалық кәсіпкерлік бөлімінің басшысы.
Семинарға қатысу үшін қалалық кәсіпкерлік бөліміне хабарласу керек.
Өтінішті аталған бөлімнің электрондық мекенжайына да жіберуге болады.
Е-mail: saudaorg@mail.ru
Гүлжан БАЗЫЛҚЫЗЫ.
