Жылқы жылы жайлы болғай жұртыма!

ЖҰЛДЫЗЖОРАМАЛ — 2026

Жылқы жылы қозғалыс пен қарқынның, батыл шешімдер мен жаңа мүмкіндіктердің кезеңі болмақ. Ал астрологтар әр жұлдызнама белгісіне түрлі бағытта даму мен сынақтар болатынын болжайды. Ендеше, келер жылы сізді не күтіп тұр?

Нұрқанат ӘЖІҚАНОВ, жасөспірімдер және жастар арасындағы Қазақстанның абсолютті чемпионы, Азия чемпионы, әлем чемпионатының екі дүркін қола жүлдегері

Жылан жылы тарих қойнауына еніп, Жылқы жылы босағамыздан аттағалы тұр. Жылқы жылы байрақты бәйгелерде асығымыз алшысынан түсіп, жеңіс тұғырынан көріне берейік. 2025 жыл мен үшін жетістікке толы жыл болды. Осы жылы Ақтау қаласында өткен каратэден (WKF) ересектер арасында Қазақстан Чемпионатында жеңімпаз атандым.Ташкентте өткен Азия чемпионатынан да олжалы оралдым. Қазір каратэ спорты бойынша әлемдік рейтингте үздік үштіктің қатарында тұрмын. Жаңа жылда әр шаңырақта шаттық пен бақыт орнасын. Бастысы, еліміздің еңсесі биік болып, көсегесі көгере берсін. Жаңалықтың жаршысына айналып үлгерген «Ақтөбе» газетінің оқырманы көп болсын!

ТОҚТЫ (21 НАУРЫЗ – 19 СӘУІР) 

2026 жыл — тоқтылар үшін батыл қадамдар мен өзгерістердің жылы. Жылқы жылы сізге ерекше жігер мен қозғалыс сыйлайды. Бұл кезеңде өзіңізге сенімді болу арқылы көптеген биікті бағындырасыз.

Кәсіби салада өсу мен жаңа мүмкіндіктерге жол ашылады. Ерте көктемде жұмысыңызда маңызды жобалар ұсынылуы мүмкін. Басшылық сіздің ұйымдастырушылық қабілетіңізді байқап, жауапты міндеттер жүктейді. Жылдың ортасына қарай табысыңыз өсіп, қосымша табыс көзі пайда болуы мүмкін. Алайда ақшаңызды шашып, орынсыз жұмсамауға тырысыңыз.

Жалғыз жүрген тоқтыларды 2026 жылы маңызды танысу күтіп тұр. Бұл — болашақ жарымен кездесу мүмкіндігі. Ал отбасылы тоқтылар үшін өзара түсіністік пен қолдау маңызды болмақ. Жылдың екінші жартысында жұбыңызбен жаңа деңгейге көтерілуіңіз мүмкін (мысалы, үй алу, бала сүю).

Физикалық белсенділікке көңіл бөліңіз. Артық күш жұмсау мен күйзеліс жүйке жүйесіне әсер етуі мүмкін. Тынығуға уақыт табыңыз. Жаз айларында демалыс пен табиғат аясында болу сізге пайдалы.

ТОРПАҚ (20 СӘУІР – 20 МАМЫР)

Торпақтар үшін 2026 жыл — тұрақтылық пен жеке даму жылы. Жылқы жылы сізге тыныштық бермейді, соның арқасында көптеген мәселені шешуге мүмкіндік аласыз. Бастапқыда жұмыс орнында кішігірім қиындықтар болуы мүмкін, алайда көктемге қарай бәрі тұрақталып, тұрақты табыс көзіңіз артады. Жұмыс ауыстыру немесе өз ісіңізді бастау жоспарыңыз болса, жылдың екінші жартысы қолайлы. Қаржылық сауаттылықты арттырып, жинақ жасауға мән беріңіз.

2026 жылы торпақтардың өмірінде романтика артады. Көктем — жаңа танысулар үшін сәтті кезең. Ал бұрыннан қарым-қатынаста жүргендер үшін бұл жыл — сезімді қайта жаңғыртудың уақыты. Жан жарыңызбен арадағы сенім нығаяды. Үйлену, бірге тұру сынды маңызды шешімдерге келуіңіз мүмкін.

Денсаулыққа биыл ерекше назар аудару қажет. Асқазан-ішек жолдары мен қан қысымына байланысты мәселелер туындауы ықтимал. Дұрыс тамақтану, спортпен шұғылдану және демалу сіз үшін басты қағида болуы керек.

ЕГІЗДЕР (21 МАМЫР – 20 МАУСЫМ) 

2026 жыл — егіздер үшін жаңа идеялар мен әлеуметтік белсенділік жылы. Жылқы жылының энергиясы сізге шабыт пен қозғалыс береді. Бұл кезеңде сіздің шығармашылық қабілетіңіз күшейіп, жаңа бағыттарға бет бұрасыз.

Кәсіби салада ойыңыздағы жобаларды жүзеге асыруға мүмкіндік туады. Жыл басында жаңа ұсыныстар, келісімшарттар күтіледі. Бірақ бәріне бірден келісе бермей, сараптап алыңыз. Жазға қарай табысыңыз өсіп, жаңа табыс көзі пайда болуы мүмкін. Қаржылық шешімдерде байыпты болған жөн.

Махаббат саласында тұрақсыздық байқалады. Бірде бәрі жақсы болып көрінсе, бірде түсініспеушілік туындайды. Эмоцияға берілмей, сабырлы болыңыз. Жалғыз жүрген егіздер жаңа адамдармен танысып, нағыз сезімді сезінуі мүмкін. Маусым-шілде — романтикаға толы кезең.Кемшілікті емес, жақсы жақты көбірек байқауға тырысыңыз. Өзіңізге талап қойғанда тым қатал болмаңыз. Кейде жай ғана ләззат алып, рахаттана біліңіз.

ШАЯН (21 МАУСЫМ – 22 ШІЛДЕ) 

2026 жыл Шаяндар үшін ішкі жаңару мен рухани өсу жылы болмақ. Жылқы жылы сізді жайлылық аймағынан шығуға итермелейді. Бұл сіздің өзіңізді тануға, мақсатты нақтылауға тамаша мүмкіндік береді.

Жылдың алғашқы жартысында қаржылық тұрақтылық пен жоспарланған табыс күтіледі. Бірақ күтпеген шығындар да болуы мүмкін. Сондықтан артық ақша жұмсамауға тырысыңыз. Жұмыста жаңа міндеттер жүктелуі мүмкін. Өз идеяңызды батыл ұсынсаңыз, басшылық қолдайды.

Отбасылы шаяндар үшін бұл жыл — қарым-қатынасты тереңдететін уақыт. Сезім, қамқорлық артады. Жалғыз жүргендер үшін тағдырлы танысу кезеңі. Бірақ жүрекке емес, ақылға құлақ асыңыз. Жаз айларында эмоциялық күйзелістер болуы мүмкін, ашуға берілмеңіз.

Психологиялық жай-күйге мән беріңіз. Артық уайым сізге кері әсер етуі мүмкін. Медитация, тыныштық, табиғат аясында серуендеу пайдалы болады.

АРЫСТАН (23 ШІЛДЕ – 22 ТАМЫЗ) 

2026 жыл арыстандар үшін күш-қуатқа толы, жарқырайтын жыл болмақ. Жылқы жылы сіздің көшбасшылық қасиетіңізді оятып, өзіңізді көрсетуге мүмкіндік береді. Жоспарларыңыздың көбі жүзеге асады. Кәсіби салада жаңа жобалар, қызметте көтерілу немесе беделдің артуы күтіледі. Қаңтар мен ақпан айларында маңызды келіссөздер болады. Жылдың ортасында табысты арттыруға бағытталған бастамалар жасайсыз. Алайда шілде-тамызда күтпеген шығындар болуы мүмкін — алдын ала жоспарлап үйреніңіз.

Бұл жылы махаббатта жаңа белеске шығасыз. Қарым-қатынасы бар арыстандар серігімен жаңа деңгейге көтерілуі мүмкін — бірге тұру, неке, бала сүю. Жалғыз жүргендер сәуір мен тамыз айлары аралығында тағдырлы кездесуге кезігуі ықтимал. Жылқы жылы физикалық белсенділік пен энергияны талап етеді. Спортпен айналысыңыз, артық салмақтан арылыңыз. Жүйке жүйесі мен жүрекке мән беріңіз.

Сізге бәрін бақылауда ұстау ұнайды, бірақ кейде ағынмен бірге жүзуді де үйреніңіз. Өзгелердің пікірін де тыңдап көріңіз.

 БИКЕШ (23 ТАМЫЗ – 22 ҚЫРКҮЙЕК) 

Жылқы жылы бикештерге тыныштық, тұрақтылық және өсу әкеледі. Бұл жылда сіз жеке дамуға, денсаулыққа және қаржылық тұрақтылыққа көбірек көңіл бөлесіз. Ішкі интуицияңыз артып, көп нәрсені алдын ала сезе бастайсыз. Кәсіби салада нақты жоспармен жұмыс істесеңіз, жақсы жетістіктерге жетесіз. Жыл басында жаңа міндеттер мен жауапкершілік жүктелуі мүмкін. Сізге сенім артады, ал сіз өзіңізді сенімді маман ретінде дәлелдейсіз. Көктем мен жазда қосымша табыс көздері пайда болуы мүмкін. Ақшаны үнемдеп, артық шығыннан аулақ болыңыз.

Жыл бойы махаббатта тұрақтылық күтіледі. Жұптардың қарым-қатынасы тереңдей түседі, ал жалғыз жүрген бикештер сәуір мен қыркүйек аралығында маңызды кездесуге тап болуы мүмкін. Сезімге емес, ақылға жүгініп шешім қабылдайсыз.

2026 жылы денсаулықты нығайтуға жақсы мүмкіндік бар. Ас қорыту, жүйке жүйесі, ұйқы режиміне мән беріңіз. Физикалық белсенділік пен дұрыс тамақтану сізге сергектік береді.Өзіңізге тым талапшыл болмаңыз, кейде демалуға да мүмкіндік беріңіз. Өмірдің қарапайым сәтінен қуаныш табуға тырысыңыз.

ТАРАЗЫ (23 ҚЫРКҮЙЕК – 22 ҚАЗАН) 

Жылқы жылы таразы белгісіндегі жандар үшін үлкен өзгерістер мен жаңалықтарға толы болады. Бұл жылы сіз өз өміріңіздегі маңызды салаларды қайта қарап, жаңаша бағыт таңдауыңыз мүмкін.

Кәсіп пен мансапта алға жылжу мүмкіндігі көп. Наурыз айынан бастап жаңа жобаларға ұсыныстар түсуі ықтимал. Өз талантыңызды көрсету үшін жақсы уақыт. Қаржы жағы тұрақты болғанымен, ірі шешімдерде мұқият болыңыз. Қарыз алуға немесе беруге асықпаңыз.

Қарым-қатынаста сезім мен ақылдың тепе-теңдігін сақтаңыз. Жұптағы таразылар арасында түсініспеушілік болуы мүмкін, бірақ сабырмен бәрін шешуге болады. Жеке жүргендер үшін жаз мезгілі — жаңа таныстық пен махаббат уақыты.

Жүйке жүйесі мен жүрекке көңіл бөліңіз. Артық уайым, күйзелістен сақтаныңыз. Йога, тыныс алу жаттығулары көмектеседі.

САРЫШАЯН (23 ҚАЗАН – 21 ҚАРАША) 

2026 жыл —  күш пен батылдық жылы. Сарышаяндар үшін бұл жыл —  батыл шешімдер мен ішкі трансформация уақыты. Өзгелер сіздің сенімділігіңіз бен табандылығыңызды байқайды. Жылқы жылы сізді жаңа деңгейге көтереді.

Кәсіпте батыл қадамдарға бара аласыз. Жаңа жұмыс, лауазым немесе жеке іс бастау —бәрі сәтті болады. Қаржы жағынан тұрақты өсім байқалады. Жыл соңына қарай ірі сатып алулар жасауға болады.

Махаббатта терең сезім мен адалдыққа мән бересіз. Тұрақты қарым-қатынастағылар арасында романтика артып, жаңа деңгейге көтерілуі мүмкін. Жалғыз жүргендер күтпеген сәтте өз жұбын табады.

Энергияңыз мол, бірақ артық күш салудан сақ болыңыз. Иммунитетті нығайтып, белсенді өмір салтын ұстанған жөн. Эмоциялық шаршаудан демалыс арқылы арылыңыз.

МЕРГЕН (22 ҚАРАША – 21 ЖЕЛТОҚСАН) 

Жылқы жылы мергендерге шекараны кеңейтіп, жаңа бағытта даму үшін үлкен мүмкіндік әкеледі. Бұл жыл сіз үшін саяхаттар, білім алу, шығармашылық пен рухани өсудің кезеңі болады.

Жыл бойы кәсіп пен мансапта тұрақтылық пен даму қатар жүреді. Жаңа идеялар мен жобаларға белсенді араласасыз. Күз айларында шетелмен байланыс орнатуға, тәжірибе алмасуға мүмкіндік туады. Қаржы жағы жақсы, бірақ артық шығыннан сақтаныңыз.

Махаббатта еркіндік пен шынайылықты бағалайсыз. Жұптағы мергендер үшін серіктесімен сенімділік пен ашықтық артады. Жалғыз жүргендер күтпеген жерден өз адамына жолығуы мүмкін.

ТАУЕШКІ (22 ЖЕЛТОҚСАН – 19 ҚАҢТАР) 

Жылқы жылы тауешкілер үшін нәтижелі, маңызды қадамдармен есте қалады. Бұл жыл — еңбекқорлығыңыздың жемісін көретін кезең.

Мансапта тұрақты даму күтіп тұр. Көктемнен бастап жаңа мүмкіндіктер мен жауапты қызметтер ұсынылуы мүмкін. Жоспарлы әрекет етсеңіз, табыс пен абырой қатар келеді. Қаржы жағы жақсы, ірі инвестициялар жасауға болады.

Жеке өмірде тұрақтылықты қалайсыз. Жұптағы тауешкілер үшін бұл — қатынасты нығайту, тіпті отбасын құру жылы. Жалғыз жүргендерге жаз мезгілі романтика сыйлайды.

Денеңізге көңіл бөліп, дұрыс тамақтануға, ұйқы режимін сақтау мен спортты қолға алыңыз. Жыл соңына қарай демалысты ұмытпаңыз.

Сабырлы мінезіңіз сізді биікке жетелейді. Тек өзіңізге көбірек сеніңіз — табыс соның артында.

СУҚҰЙҒЫШ (20 ҚАҢТАР – 18 АҚПАН) 

Жылқы жылы суқұйғыштар үшін тосын әрі қызықты болады. Жаңалыққа құштар мінезіңіз бұл жылы да сізге алға жылжуға көмектеседі. Өзгерістерден қорықпай, ішкі түйсігіңізге сеніңіз. Кәсіби салада күтпеген ұсыныстар түсіп, жаңа бағыттар ашылады. Ерекше идеяларыңызды жүзеге асырудың сәті келеді. Көктемде немесе күзде жұмыс ауыстыруыңыз мүмкін. Қаржылық тұрақтылыққа жету үшін шығындарды дұрыс жоспарлаңыз. Суқұйғыштар үшін 2026 жылы қарым-қатынас маңызды рөл атқарады. Жұбы барлар жаңа деңгейге көтерілуі мүмкін (мысалы, үйлену, бірге тұру). Жалғыз жүргендер көктем мен жаздаөз адамымен танысуы мүмкін.

Жыл бойы сергектікті сақтауға тырысыңыз. Көбірек қозғалыс, таза ауа, дұрыс демалыс —  бәрі де сіз үшін маңызды. Эмоционалды күйзелістен сақ болыңыз.

Еркін ой мен жаңашылдық — сіздің басты артықшылығыңыз. Бірақ кейде тұрақтылықты да бағалауды үйреніңіз.

БАЛЫҚТАР (19 АҚПАН – 20 НАУРЫЗ) 

2026 жыл — рухани өсу мен ішкі үйлесім жылы. Бұл жыл балықтар үшін өзін терең тану мен шығармашылықты дамыту кезеңі болады. Сезімталдығыңыз сізге адамдармен байланыс орнатуда көмектеседі, бірақ шекара қоюды да ұмытпаңыз. Жұмыс орнында интуицияңыздың көмегімен жақсы шешімдер қабылдайсыз. Жылдың ортасында шығармашылыққа немесе көмек көрсету саласына қатысты ұсыныстар түсіп қалуы мүмкін. Қаржылық тұрақтылық болады, бірақ артық сенімге беріліп, ақшаңызды алдап кететіндерден сақтаныңыз.

Жұбы бар балықтар қарым-қатынасты тереңірек түсінуге ұмтылады. Жалғыз жүргендер үшін күз айлары романтика мен жаңа бастамаларға толы болмақ.

Эмоцияларыңызды басқаруды үйреніңіз. Йога, медитация, табиғат аясындағы демалыс сізге сергектік береді. Иммунитетке көңіл бөліңіз.

Өзіңізге сеніңіз және жүрегіңізді тыңдаңыз. Биыл сіздің рухани жаңару жылыңыз болады.

 Кәмшат ҚОПАЕВА.