Ақтөбе тазарып қалды

«Таза Қазақстан» жалпыұлттық акциясы аясында өткен сенбіде Ақтөбеде алғашқы сенбілік өтті. Іс-шараға мемлекеттік және коммуналдық мекемелер, кәсіпкерлік нысандары, мердігер ұйымдар, пәтер иелері кооперативтері мен қарапайым тұрғындар белсенді қатысты. Облыс әкімі Асхат Шахаров сенбілікке қатысқан ақтөбеліктерге алғысын білдірді.

Әкім алғысы

27 наурыз бен 31 мамыр аралығында облыста елді мекендерді абаттандыру және санитарлық тазарту бойынша екі айлықтың жарияланғаны белгілі. Негізгі мақсат — аумақтарды тазалау, көгалдандыру және өңірдің экологиялық жағдайын жақсарту.

Осыған орай өткен сенбіде Ақтөбе қаласында жалпықалалық сенбілік ұйымдастырылды. Оған қала тұрғындары, белсенді азаматтар, әкімдік қызметкерлері, депутаттар, кәсіпкерлер, түрлі мекеме ұжымдары қатысты. Қатысушылар өздеріне бекітілген аумақтар мен аулаларды тазалады.

Сенбілікке облыс әкімі Асхат Шахаров пен Ақтөбе қаласының әкімі Азамат Бекет те қатысып, белсенді ақтөбеліктерге алғыс айтты. Мемлекеттік қызметкерлер саябақтарды тазалау барысында ақсақалдардың алғысын алды.

— Бізге сіздердей үлкендердің ақыл-кеңесі мен қолдауы аса маңызды. Жастарды өз ауласын, қаламызды таза ұстауға шақырып, бағыт-бағдар беріп отырсаңыздар, нұр үстіне нұр. Тазалық — тәртіптің белгісі. Сенбілікпен ғана шектелмей, күнделікті тазалыққа мән беруіміз қажет, — деді Асхат Шахаров.

Ақтөбе қаласы әкімдігінің мәліметінше, тазалық шарасына қатысушыларға қажетті құрал-жабдықтар беріліп, арнайы техника жұмылдырылған. Екі айлық барысында Ақтөбедегі қатты-тұрмыстық қалдықтар полигоны қоқысты тегін қабылдады.

Жалпықалалық сенбілікте облыс әкімдігі, облыстық және қалалық мәслихат аппаратының қызметкерлері қаладағы «Триатлон» саябағы аумағын жиыстырса, құрылыс, сәулет және қала құрылысы, мемлекеттік сәулет-құрылысты бақылау, денсаулық сақтау басқармасының қызметкерлері Жеңіс даңғылындағы сквер бойын тазалады. Сондай-ақ қаладағы сулы-жасыл бульвар мен Ақтөбе қаласындағы №17, 39 мектеп аумағындағы, Бейбітшілік даңғылы, М.Мәметова көшесі бойындағы скверлерде және шаһардың өзге аумақтарында мемлекеттік қызметшілер сенбілік жұмыстарын жүргізді.  

Орманшылар өзен жағасын жиыстырды

«Таза Қазақстан» экологиялық акциясы аясында «Мөлдір бұлақ» іс-шарасы да өтті. Ақтөбе орман шаруашылығы қызметкерлері Елек өзенінің жағасын тазалады. Сенбілік жұмысына жиырмадан аса адам қатысты.

Тазалық жұмыстары барысында өзен маңындағы қоқыстар жиналып, табиғи аймақ ретке келтірілді. Қатысушылардың еңбегінің нәтижесінде шамамен 700 келі қоқыс жиналып, арнайы трактордың көмегімен полигонға жеткізілді.

Ұйымдастырушылар қала тұрғындарын қоршаған ортаны таза ұстауға шақырып, мұндай экологиялық акциялардың маңыздылығын атап өтті. «Таза табиғат — жарқын болашақ кепілі» деген ұстанымды негізге алған орманшылар алдағы уақытта да сенбілікке шығуды жалғастырады.

Бір кісідей жұмылды

Ақтөбеде ұйымдастырылған жалпықалалық сенбілікте бірқатар еңбек ұжымы саяси қайраткер Василий Зинченкоға қойылған ескерткіш алаңын күл-қоқыстан тазалады. Бұл маңды көктемгі күл-қоқыстан тазартуға Ақтөбе қалалық ішкі саясат, денешынықтыру және спорт, ауыл шаруашылығы бөлімдерімен қатар, қалалық жастар ресурстық орталығы сияқты өзге де ұжымдар бекітілген. 

— Ұжым болып алғашқы сенбілікке шықтық. Айналамызды тазарту жұмыстарына жастар белсенділік танытты. Сенбілік аясында қала аумақтары мейлінше тазартылатын болады. Алғашқы сенбілікте бізге бекітілген аумақ — кезінде Ақтөбе уездік жұмысшы-шаруа депутаттары кеңесінің бірінші төрағасы болған Василий Зинченкоға қойылған ескерткіш айналасын тазаладық. Бұл жерде бізден басқа да ұжымдар, яғни жалпы саны 50-ге тарта адам жұмыс жасадық. Қаламызда тазалау жұмыстары екі ай бойы жүргізіледі. Сондықтан мұндай іс-шарада жастардың белсенділік танытқанын қалаймын, — деді Ақтөбе қалалық жастар ресурстық орталығының басшысы Азамат Әбуов.

Сенбілікке шыққан ұжымдар ескерткіш айналасындағы күл-қоқыстарды жинап, қапшықтарға салды. Талдардың түбі қопсытылып, тырмалау жұмыстары жүргізілді.

Бұл күні облыстық ішкі саясат басқармасы және аталған басқармаға қарасты «Қоғамдық келісім» мекемесі мен өңірлік коммуникациялар қызметінің өкілдері де сенбілікке шықты. Олар өздеріне бекітілген аумақ — қаланың Бейбітшілік даңғылы бойындағы «Жасыл аймақта» («Компас» жанармай құю бекеті, «Сенім» емханасының аумағы) тазалаужұмыстарын жүргізсе, Ақтөбе қаласындағы «Aqtobe su-energy group» АҚ-ның 300-ге жуық қызметкері кәсіпорынның барлық нысанының аумағын көктемгі күл-қоқыстан тазартты.

Сквер аумағындағы сенбілік

Ақтөбе қаласындағы Кереев көшесі бойындағы скверде де сенбілік жұмыстары ұйымдастырылды. Бұл маңды бірқатар мемлекеттік мекеме қызметкерлері тазартты.

Сквер аумағын тазалауға санитарлық-эпидемиологиялық бақылау департаменті, Ақтөбе қаласы бойынша мемлекеттік кірістер басқармасы, Медициналық және фармацевтикалық бақылау комитетінің Ақтөбе облысы бойынша департаменті, Ақтөбе бөлімшелік көліктегі санитарлық-эпидемиологиялық бақылау басқармасы мен қалалық санитарлық-эпидемиологиялық бақылау басқармасының ұжымдары шықты.

 — «Таза Қазақстан» жалпыұлттық акциясына әрбір азамат қатысуға тиіс. Акция шеңберінде ұйымдастырылып жатқан жалпықалалық сенбілікке ұжым болып шықтық. Жалпы аймақтағы салық органына қаланың үш аумағы бекітілді. Соның ішінде Кереев көшесі бойындағы сквер мен 41-разъезд аумағында тазарту жұмыстарын жүргізетін боламыз. Өзімізге бекітілген аумақты тазалап, қоқыстарды бір жерге жиыстырдық. Брусчатканы сыпырып, талдарды түптеп, қапшықтарға толтырылған күл-қоқыстар жол бойына шығарылды, — дейді Ақтөбе қалалық мемлекеттік кірістер басқармасы басшысының орынбасары Бекболат Көкшин.

Оның айтуынша, бұл жолы сенбілікке жалпы саны 40-қа тарта адам жұмылдырылған.

Ақтөбе қалалық санитарлық-эпидемиологиялық бақылау басқармасының бас маманы Эльмира Қазиеваны да біз осы сквер бойынан жолықтырдық. Ол  әріптестерімен бірге сенбілік жұмыстарын ертемен бастағанын айтады.

—  Алғашқы сенбілікке оншақты адам шықтық. Әуелі біз сквер бойындағы шашылған қоқыстарды жинап, қураған жапырақтарды тырмалап, бір жерге үйдік.  Кереев көшесі бойындағы көпқабатты үйлердің тұрғындары, әсіресе ата-әжелер бізге ризашылықтарын білдірді. Сенбілікке шығу — ортақ міндет. Сондықтан «Таза Қазақстан» акциясына бір кісідей атсалысып, айналаны көркейтуге қолдау танытқанымыз дұрыс. Өз басым мұндай сенбіліктердің жиі ұйымдастырылғанын қалаймын, — дейді Эльмира.

Бұл күні Медициналық және фармацевтикалық бақылау комитетінің Ақтөбе облысы бойынша департаменті бас маманы Асқар Жаңабергенов штаттағы  15 адамның дені алғашқы сенбілікке шыққанын айтты.

— «Таза Қазақстан» акциясы  — экологияны жақсартуға және таза өмір салтын насихаттауға бағытталған маңызды бастама. Біздің қоғамда қоршаған ортаға ұқыптылық танытып, табиғатты қорғау мәдениетін дамыту өте өзекті. Бұл акцияның негізгі мақсаты — қалалар мен ауылдардың тазалығын сақтау ғана емес, сонымен қатар адамдардың экологиялық жауапкершілігін арттыру. Сондықтан мұндай сенбіліктерде қарапайым тұрғындардың да белсенділік танытып, өз үйлерінің айналасын тазалағаны жөн, — дейді Асқар Жаңабергенов.

Тазалық дағдыға айналуы керек

Алғашқы сенбілікте Ақтөбе қаласының 8-шағын ауданындағы «Ғашықтар» гүлзарында тазалық жұмыстарын жүргізу төрт басқарма қызметкерлеріне жүктелді. Ауыл шаруашылығы, жер қатынастары, кәсіпкерлік және табиғи ресурстар және табиғатты пайдалануды реттеу басқармаларының мамандары ертемен келіп, жұмысқа кірісті. Сенбілікке қатысушылардың басым бөлігі ер адамдар болғандықтан, бұл маңда жұмыстез аяқталды. Қолдарына күрек пен тырмаларын алып, жиналған қоқысты қапқа салған олар бас-аяғы бір сағаттың ішінде аумақты тазалап, бұталарды қырқып, жасыл аймақтарды ретке келтірді. Таңғы сағат 10.00-ге дейін саябақ жолдары сыпырылып, қоқыс жиналды. Ветеринария басқармасы басшысының орынбасары Бердімұрат Бекжановтың айтуынша, сенбілік өтетін орындар арнайы жоспарға сәйкес өзгеріп отырады. «Қаладағы ең ластанған, шеткері аумақтарға ерекше басымдық беріледі. Мұндай шаралар экологияны жақсартып қана қоймай, адамдарды ортақ мақсат — қаламыздың тазалығына қамқор болу жолында біріктіреді», — дейді ол.

Сонымен қатар алғашқы сенбілікте Ақтөбе қалалық құрылыс бөлімі мен «Ақтөбе құрылыс компаниясы» ЖШС қызметкерлері Есет батыр тұрғын алабындағы Есет Көкіұлының ескерткіші маңында тазалық жұмыстарын жүргізді. Акцияға қатысқан 16 адам қыстан қалған күл-қоқысты жинап, айналаны ретке келтірді.

— «Таза Қазақстан» акциясын қолдаймын және қала тұрғындарын осы шараға белсенді қатысуға шақырамын. Бұл бір күндік іс-шарамен шектелмеуі керек, әр азаматтың күнделікті дағдысына айналуға тиіс. Егер әркім өз ауласын, көшесін таза ұстап, табиғатты аяласа, біз шын мәнінде таза Қазақстанды қалыптастыра аламыз, — дейді сенбілікке қатысқан Ақтөбе қалалық құрылыс бөлімінің бас маманы Айгүл Олжабай.

Оның айтуынша, мұндай іс-шаралар қала экологиясы үшін ғана емес, қоршаған ортаға жауапкершілікпен қарауды қалыптастыру және ұжымды біріктіру үшін де маңызды.

Бұл күні облыстың барлық ауданында да тұрғындар сенбілік жұмыстарына белсенді қатысты.

 Арайлым НҰРБАЕВА.