«Таза Қазақстан» акциясы: Халықаралық құстар күнінде ақтөбелік оқушылар құстарға ұя жасады
Ақтөбеде Мемлекет басшысының бастамасымен қолға алынған «Таза Қазақстан» акциясы аясында Халықаралық құстар күніне арналған ерекше экологиялық акция ұйымдастырылды.
Ақтөбе қаласының Әл-Фараби атындағы №21 мамандандырылған гимназиясында өткен шараның басты мақсаты — оқушыларға экологиялық мәдениеттің маңыздылығын түсіндіру, табиғатқа деген жауапкершілікті қалыптастыру және жас ұрпақты табиғатты қорғау қызметіне тарту.
Акция аясында гимназия оқушылары құстарға ұя жасап, құстардың қалалық ортада популяциясын сақтау мен көбейту ісіне өз үлестерін қосты. Бұл бастама Ақтөбе облысындағы 400-ден астам білім беру ұйымы мен қаладағы гүлзарлар мен саябақтарды қамтып, 1000-нан астам құс ұясын дайындауға мүмкіндік берді.
Гимназияның жаратылыстану пәнінің оқытушысы, педагог-зерттеуші Әсел Әниева іс-шараның экологиялық мәдениетті қалыптастырудағы маңызды қадам екенін атап өтті.
«Құс ұясын жасау және орнату акциясы – бұл жай ғана экожоба емес, өскелең ұрпақтың жаңа экологиялық мәдениетін қалыптастырудағы маңызды қадам. Ол табиғатқа ұқыпты қарауға және биоәртүрлілікті сақтауға бағытталған «Таза Қазақстан» жалпыұлттық бағдарламасының мақсаттарымен тікелей байланысты.
Құстар ұясын жасау кезінде оқушылар экологияға қамқорлық қарапайым, бірақ мағыналы әрекеттерден басталатынын түсінеді. Мұндай бастамалар бір реттік әрекет емес, өмір салтына айналу үшін жүйелі болуы керек», — деп Әсел Әниева пікір білдірді.
4-сынып оқушысы Әлихан Байтуғанов та бұл акциядан алған әсерімен бөлісіп, табиғатқа қалай көмектесуге болатынын түсінгенін айтты.
«Біз қандай құстарға ұялар қажет екенін, оларды қалай дұрыс жасау керектігін және қайда орнату керектігін білдік. Бұл өте қызықты болды. Енді мен табиғатқа қарапайым, бірақ маңызды нәрселермен көмектесуге болатынын түсіндім.
Мұндай іс-шаралар бізді қоршаған әлемге ұқыпты қарауға үйретеді. Тіпті кішкентай игі істер оны жақсы жаққа өзгерте алады», — деді ол.
Іс-шара соңында оқушылар мен мұғалімдер бұл жобалардың тек құстар популяциясының көбеюіне ғана емес, сондай-ақ жауапкершілік сезімін қалыптастыруға да ықпал ететінін тілге тиек етті. Қатысушылар өздерінің бастамаларымен басқаларды экологиялық бастамаларға тартуға, табиғатқа қамқорлық жасауға шақыратындығына сенім білдірді.
А.МӘЛІКҚЫЗЫ.
