Ақтөбеде биыл демеушілердің қолдауымен 11 қоғамдық кеңістік абаттандырылады

Бүгін өңір басшысы Асхат Шахаровқа қала әкімі Азамат Бекет алғашқы 3 алаңның жобасымен таныстырды. Оның біріншісі – Алтын Орда ауданы Мәңгілік ел көшесіндегі аумақ. Өткен күзде қарағайлар отырғызылған бұл орынды енді «Зерде Керамика Ақтөбе» ЖШС шағын сквер ретінде абаттандырып береміз деп отыр. 

«Биыл өткен жылғы үрдісті жалғастырып, 11 учаскені тұрғындардың демалысына ыңғайлы алаң етіп жасақтаймыз. Оған ақтөбелік кәсіпорындар қолдау көрсетіп отыр. Барлық кеңістіктерге оларға ағаш отырғызуды, суару жүйесін тартуды, брусчаскалар төсеуді, орындықтар, урналар, кіші архитектуралық формалар, түнгі жарықтандыру шамдарын орнатуды міндеттеп отырмыз», – деді Азамат Бекет. 

Облыс басшысы бұдан кейін М.Мәметова көшесінің бойындағы «Керуен» ойын-сауық, сауда орталығына қарсы беттегі бос жатқан учаскеге барды. Бұл жерді абаттандыруды «Алихан ОЙЛ» ЖШС міндетіне алды. Облыс әкімі компания басшылығына өсіп тұрған ағаштарды кеспей, тұрғындарға қолайлы алаң етіп жайластырып беруді тапсырды. 

Ал Есет батыр (Нұр Ақтөбе) тұрғын алабында №72 мектеп пен көпқабатты үйлердің арасындағы бос кеңістікті «Анвар» сауда желісі абаттандырмақ. Олар бұл жерге тұрғындардың демалысына арналған сквер салады, көгалдандырады, суару жүйесін орнатады. 

Жобалармен танысып, кәсіпорын басшыларын мұқият тыңдаған Асхат Шахаров ең алдымен сапаға мән берілу керектігін ескертті, қаланың көркеюіне үлес қосуға ниет білдіргендері үшін алғысын жеткізді. 

«Шағын саябақтар қаланың өзінде ғана емес, оның аумағындағы елді мекендерде де көп болғаны жөн. Үлкен жобаларды атқаруға қала әкімдігі күш салады. Ал осындай шағын учаскелерді абаттандыруға өздеріңіздей азаматтардың қолдауы керек. Жалпы, қаламыздың дамуына үлес қосу – азаматтық парызымыз. Сіздер қала әкімінің ұсынысын қабыл алып, абаттандыру жұмыстарына үлес қосып жатсыздар. Енді міндеттеріңізге алған жобаларды сапалы жасап, уақытылы аяқтайтын болсаңыздар, халықтың алғысына бөленесіздер», – деді облыс әкімі.

Еске салайық, былтыр «Зерде керамика Ақтөбе», «Анвар», «Көктас Ақтөбе», «IC Petroleum» компаниялары және Ақтөбе металл конструкциялары зауыты қалада бос жатқан 5 алаңқайды абаттандырып, тұрғындар отырып демалатын шағын скверлер жасақтап қойды. Бұл жұмыс биыл да жалғасады. Өзге де компаниялар тағы 11 учаскені қоғамдық кеңістіктерге айналдыруға уәде беріп отыр