Ақтөбеде 6745 адам қуғын-сүргінге ұшырады
31 мамыр — Саяси қуғын-сүргін құрбандарын еске алу күні
Облыстық тарихи-өлкетану музейі қорларды ғылыми-зерттеу бөлімінен алынған мәлімет бойынша, Қазақстан Республикасының «Жаппай саяси қуғын-сүргіндер құрбандарын ақтау туралы» 1993 жылдың 14 сәуірдегі Заңына сәйкес, Ақтөбе облысы бойынша Ұлттық қауіпсіздік комитеті басқармасы 1930-1950 жылдарда заңсыз қуғын-сүргін құрбандарын ақтау бойынша жұмыс жүргізген. Осыған байланысты көрсетілген жылдарда аймақта қылмыстық жазаға 6745 адам тартылған, оның 1615-і ату жазасына кесілгені анықталды. Ақталғандар саны — 6432.
1996 жылы басқармағарепрессия құрбандары ұрпақтарынан 71 арыз түскен. Архивтік құжаттарда қуғын-сүргінге түрлі әлеуметтік сала мен маман иелері ұшыраған, соның ішінде ату жазасына кесілгендер:
- колхоз, ауылшаруашылық артельдерін басқарған 98 адам;
- қарапайым колхоз шаруаларынан 215 адам;
- құқыққорғау органдары, сот, банк, байланыс, сауда, мәдениет салаларынан 49 адам.
1997 жылы жарық көрген «Қуғын-сүргін құрбандары» атты үш томдық кітаптағы мәліметтерде Ақтөбе қаласы бойынша 1340 адам, Шалқар ауданында — 555, Табын ауданында (қазіргі Байғанин) — 465, Темірде — 388, Ойылда— 260, Ырғызда — 236, жалпы облыс бойынша 6400 адам қуғын-сүргінге ұшыраған. Ақтөбе облысы бойынша 156 «халық жауларының» әйелдері ұсталды, олардың жалпы саны 562баласы мен қолында тәрбиеленіп отырған 15 жасқа толмаған бауырлары түрлі концлагерлерге, НКВД балалар үйлеріне жіберілген.
Арайлым НҰРБАЕВА.