Әңгіме өзегі — отбасы құндылығы
Семинар
Ақтөбе қаласындағы «Анаға тағзым» рухани-адамгершілік тәрбие беру орталығында «Әйелдік күш» семинар-тренингі және «Гендерлік саясатты іске асырудағы өзара іс-қимыл алгоритмі» атты дөңгелек үстел өтті.
Ақтөбе қаласының әйелдерді қолдау орталығы қоғамдық бірлестігінің ұйымдастыруымен өткен шараға үкіметтік емес ұйымдардың және мемлекеттік органдардың өкілдері, облыс әкімі жанындағы әйелдер істері және отбасылық-демографиялық саясат жөніндегі комиссия мүшелері, сондай-ақ әртүрлі салада қызмет етіп жүрген қыз-келіншектер қатысты.
Семинарда психологиялық тренингтер ұйымдастырылып, бала тәрбиесі, ажырасу мәселесі, өмірлік мақсаттарды дұрыс қоя білу, кәсіппен айналысу, жетістікке жету секілді тақырыптар кеңінен айтылды.
— Ақтөбе қаласының әйелдерді қолдау орталығы қоғамдық бірлестігі 2001 жылы өз жұмысын бастады. Бұл ұйым — әйелдер мен балаларға әлеуметтік көмек ретінде құрылған үкіметтік емес ұйымдардың бірі.
Орталықтың бағыты — отбасылық зорлық-зомбылық мәселелері бойынша психологиялық және заңгерлік көмек көрсету, отбасын нығайту жөнінде ақпараттық-насихаттау жұмыстарын жүргізу, — дейді Ақтөбе қаласының әйелдерді қолдау орталығы қоғамдық бірлестігінің төрайымы Айгүл Дүйсенова.
Ақтөбе қаласының әйелдерді қолдау орталығы бүгінгі күнге дейін отбасын нығайту, отбасылық құндылықтарды насихаттауға бағытталған 50-ден астам әлеуметтік жобаны жүзеге асырды. Сонымен қатар, облыстық ішкі саясат басқармасының қолдауымен «Отбасылық құндылықтарды насихаттау, әйелдер бастамаларын қолдау, гендерлік теңдікті дамыту» бойынша көптеген іс-шаралар ұйымдастырды.
Ақбота БОЛАТБЕКҚЫЗЫ.