Бетпе-бет жүздесулер
Ақпараттық-насихат тобы Байғанин ауданына жолға шықты. Дүйсенбі күні топ мүшелері Ақжар, Қаратөбе, Лақтыбай ауылдары тұрғындарымен, сондай-ақ аудан аумағында жұмыс істейтін мұнай компаниялары ұжымдарымен кездесті. Аталған топ құрамында шығармашылық интеллигенция өкілдері, еңбек ардагерлері бар.
Президент Жолдаулары, Мемлекет басшысының «Болашаққа бағдар: қоғамдық сананы жаңғырту» бағдарламалық мақаласы әңгіменің басты арқауына айналды. Сондай-ақ елімізде жүзеге асырылып жатқан мемлекеттік бағдарламалардың мәні кеңінен түсіндірілді. Тұрғындар осы мәселелер бойынша өздерін толғандырған сауалдарға жауап тапты.
Топ мүшелері байғаниндіктерге қолға алынған мемлекеттік бағдарламалардың әлеуметтік-экономикалық тиімділігі туралы жан-жақты айтып берді. Сонымен бірге шалғайдағы елді мекендер проблемалары кеңінен қозғалды.
Кездесуге келгендер мұндай шараның өздері үшін аса қажетті екенін атап көрсетті. Негізінде қазақстандықтардың әл-ауқатын жақсартуды көздейтін мемлекеттік бағдарламалардың әлеуетін ашып көрсету олар үшін маңызды екендігін тілге тиек етті.
Ақпараттық-насихат тобының алдағы кездесулері Дияр, Миялы, Оймауыт, Баршақұм, Алтай және Қаражар ауылдарында жалғасады.
Кездесуге қатысушыларға 2018 жылға облыстық «Ақтөбе» және «Актюбинский вестник» газеттеріне тегін жазылу сертификаттары тапсырылды.
Н.ДОСОВ.