Жанар-жағармай ұрлағандарға сот үкімі шықты
Қылмыс
Байғанин аудандық сотында жанар-жағармай отынын ұрлаумен айналысқан төрт сотталушыға қатысты қылмыстық іс қаралды.
Оқиға істің материалдарына сәйкес, биыл 31 шілдеде сағат 22.00 шамасында болған. Байғанин ауданындағы «Северная трува» кен орнында «СНПС-АқтөбеМұнайГаз» АҚ-да машинист қызметін атқаратын сотталушылар жанар-жағармай отынын сатып алуға «УАЗ» маркалы автокөлігімен келген адамдармен алдын ала келіскен. Пайдакүнемдік ниетпен, «СНПС-АқтөбеМұнайГаз» АҚ-ның меншігіне тиесілі жүк көліктерінің багінен құны 116 697 теңгеге бағаланатын 1 400 литр жанар-жағармай отынын жасырын түрде ұрлаған. Оны 56 000 теңгеге сатып, ҚР ҚК-нің 188-бабының 2-бөлігінің 1-тармағында көрсетілген қылмысты жасаған.
Сот үкімімен айыпталушылар кінәлі деп танылып, олардың мүліктері тәркіленді. Әрқайсысына 2 жыл мерзімге бас бостандықтарын шектеу жазасы тағайындалып, 2 жылға пробациялық бақылау белгіленді.
Сонымен қатар, айғақ заттар 1 400 литр жанар-жағармай отыны жәбірленушіге қайтарылып, қылмыстық жолмен келген табыс 56 000 теңге мемлекет кірісіне тәркіленді.
Үкім заңды күшіне енді.
Нұрлыбек КАДИРОВ,
Байғанин аудандық
соты кеңсесінің
аға сот приставы.