Сәрсенбі күні Наурызнама онкүндігі аясында «Жаңару — жақсылық нышаны» мәдени шарасы өтті. «Қазақ халқына мың алғыс!» стеласы маңында киіз үй тігіліп, ұлттық ойындар ұйымдастырылды.
Облыс әкімінің орынбасары Жолдас Батырхан, мәдениет қызметкерлері, тұрғындар қатысқан жиында жастар алтыбақан теуіп, ұмыт бола бастаған «Ақсүйек», «Орамал тастау», «Соқыр теке», басқа да ұлттық ойындарымызды жаңғыртты.
— 19 наурыз — Жаңару күні. Бұл күні өткенімізді еске алып, ұмыт болған құндылықтарымызды қайта жаңғырту, ұлт жадында мәңгі сақтау үшін игі дәстүрлер мен іс-әрекеттерді ұсыну мақсаты көзделді. Әріптестеріміз ұлттық құндылықтарды насихаттап, жастарды өз елінің мәдени мұрасы мен тарихына құрметпен қарауға шақырды.Театрландырылған шағын қойылым ұсынылды.
1 сағатқа жоспарланған мәдени-көпшілік шарамыз қызықты өтті. Ауыз бекіткен адамдар екі киіз үйде ұлттық тағамдардан дәм татты. Ақтөбе қаласындағы мәдениет мекемелерінен барлығы 100-ге тарта қызметкер өнерін көрсетті, — дейді Ақтөбе қалалық мәдениет және тілдерді дамыту бөлімінің сектор меңгерушісі Жазира Бақытжанова.
Ойын-сауық кешінде молшылық пен тоқшылықтың символы — тайқазанның жанында жүргізушілер Наурызға қатысты аңыз-әңгімелер айтып, шежіре жөнінде сыр шертті. Байырғы әндер шырқалып, жиналғандар «Қара жорға» биледі. «Әлия гүлі» қазақ би ансамблі шараның көркін қыздыра түсті.
— Орталық саябақ маңынан өтіп бара жатып, ойламаған жерден осындай шараға тап болдым. Ауа райының қолайсыздығын есептемегенде, барлығы қызықты өтті. Осындай мәдени-көпшілік шаралардың көп ұйымдастырылғаны дұрыс. Наурыз мейрамы барлығымызға құтты болсын! — деп тілегін білдірді зейнеткер Ақмарал Қамиева.
Соңында үлкендер бата беріп, Ұлыстың ұлы күні қарсаңында баршаға жақсылық тіледі.
Айбек СЕРІКҰЛЫ.
