Үздіктер анықталды

Фестиваль

Ақтөбеде «Алақай» қуыршақ театрының ұйымдастыруымен VІI облыстық «ЕркеТеатрAqtobe» атты балалар театр фестивалі қорытындыланды. Дәстүрлі фестивальге Ақтөбе қаласы мен облыс аудандарынан 3-11 жас аралығындағы 300-ге жуық мектеп оқушысы мен балабақша тәрбиеленушісі өнер көрсетті.

Өнерпаздар «Үздік спектакль», «Үздік актерлік ансамбль», «Үздік музыкалық сүйемелдеу», «Үздік қазақы спектакль» және тағы да басқа бірнеше номинация бойынша сынға түсті. Өнерлі балалардың фестивалі Халықаралық театр күніне және «Алақай» қуыршақ театрының 40 жылдығына орай ұйымдастырылды.

А.Байтұрсынұлы атындағы №24 лингвистикалық мектеп-гимназиясы аталған өнер додасына тыңғылықты дайындалып келген. Олар кішкентай театр көрермендерінің назарына «Мен және театр» қойылымын ұсынды.

— Жас өрендердің басын қосқан театр фестиваліне биыл үшінші мәрте қатыстық. Балалардың актерлік шеберлігі, өзін-өзі ұстауы қазылар алқасының көңілінен шықты. «Мен және театр» қойылымын таңдаудағы мақсатымыз — жас жеткіншектердің театр өнеріне деген қызығушылығын арттыру, балалардың шығармашылығын шыңдау. Бұл — менің авторлық туындым. Ең бастысы — бұл қойылымда өнер көрсеткен балалар шығарманы түсініп, шеберліктерін көрсете алды. Кейбір өнер ұжымдары фестивальге күрделі туындыларды дайындап келген. Классик жазушылардың шығармаларын сомдау бастауыш сынып оқушыларына қиындық соқтыратыны сөзсіз. Сондықтан сахналық қойылымға таңдалатын шығарма балалардың жасына сәйкес таңдалуға тиіс, — дейді драма үйірмесінің жетекшісі Әлішер Орынбасаров.

Фестивальге Тахауи Ахтанов атындағы облыстық драма театрының режиссері Жеңісбек Қалқабеков, «Алақай» қуыршақ театрының актрисалары Гүлнар Баймағамбетова мен Гауһар Оралбай және басқа да осы саланы жетік меңгерген мамандар қазылық етті.

Екі күнге созылған фестиваль нәтижесінде мектепке дейінгі ұйымдар арасында «Ең үздік режиссерлік жұмыс» номинациясы бойынша №12 «Інжугүл» балабақшасы,«Үздік музыкалық сүйемелдеу» номинациясы бойынша №6 «Орман ертегі» балабақшасы, «Үздік қазақы спектакль» номинациясы бойынша №49 «Думан» балабақшасы және тағы басқалары үздік деп танылды. Ал мектептер арасында  «Үздік қойылым» номинациясы бойынша А.Байтұрсынұлы атындағы №24 лингвистикалық мектеп-гимназиясы, «Үздік актерлік ансамбль» номинациясы бойынша Ә.Ермеков атындағы №23 орта мектеп-лицейі , «Заманауи қойылым» номинациясы бойынша №17 гимназиясы жеңімпаз атанды. Сондай-ақ 35 номинация бойынша үздіктер анықталып, арнайы сыйлықпен марапатталды. Театр фестивалінің соңында барлық қатысушыға диплом мен естелік сыйлық табысталды.

Ақмарал МҰҚАШЕВА.