Өңірдің индустриялық дамуы қандай?

Инвестиция

Өткен жылы облыста тауар айналымы 4,4 млрд долларға жетті, оның ішінде экспорт — 2,8 млрд доллар, импорт — 1,6 млрд доллар. Жалпы, облыс тауар айналымы бойынша әлемнің 52 елімен белсенді қарым-қатынас орнатқан.

Бұл туралы өңірлік коммуникациялық қызмет алаңында «Өңірдің индустриялық дамуы туралы» тақырыбында өткен баспасөз конференциясында Ақтөбе облысы индустриялық-инновациялық даму басқармасының басшысы Досжан Әлібеков айтты.

— Мемлекет басшысы Қасым-Жомарт Кемелұлы Тоқаев «Әділетті мемлекет. Біртұтас ұлт. Берекелі қоғам» атты Қазақстан халқына Жолдауында атап өткендей, біздің алдымызда тұрған басты міндеттің бірі —  инвестиция тарту жұмысын жүйелі жүргізу.Облыс әкімі Асхат Шахаров инвестиция тарту қарқынын күшейтуді, импортты алмастыратын тауарларды анықтап, инвесторларға жүйелі түрде ұсынуды  және осы арқылы қазақстандық қамтуды Ақтөбе облысының отандық тауар өндірушілеріне басымдық бере отырып ұлғайтуды тапсырды.

Жалпы, осы тапсырманы орындау мақсатында тұрақты түрде индустриялық-инновациялық даму басқармасымен  талдау жұмыстары жүргізіліп келеді, — деген басқарма басшысы өңірдегі өнеркәсіп саласының дамуына, инвестиция тарту мәселелеріне тоқталды.

Былтыр өнеркәсіптің нақты көлем индексі 2,6 трлн теңгеге жетіп, өнім көлемі артқан. Облыс экономикасына901,1млрд теңге инвестиция тартылыпты.

— Негізгі капиталға инвестициялар тарту бойынша 2025 жылға арналған декомпозицияға сәйкес облыс әкімі биыл өңір экономикасына 1,5 триллион теңге көлемінде инвестиция тарту тапсырмасын қойды. Оның басым бөлігі өнеркәсіп саласына тиесілі (50%), соның ішінде 337 миллиард теңге — тау-кен өнеркәсібіне, ал 36,8 миллиард теңгесі өңдеу өнеркәсібіне бағытталған, — деді Досжан Әлібеков.

Биыл қаңтар-ақпан айларында өңірге 83,5 млрд теңге инвестиция тартылды, алдыңғы жылдың сәйкес кезеңімен салыстырғанда нақты көлем индексі 106,4% болып отыр.

Облыста инвестиция көлемі 3,3 трлн теңге болатын 74 инвестициялық жоба іске асырылуда, бұл 13 мыңнан астам жұмыс орнын құруға мүмкіндік береді. Биыл өңірде инвестиция көлемі 491 млрд теңге болатын 10 инвестициялық жоба іске асыру жоспарланып отыр. Нәтижесінде 1,2 мыңға жуық жұмыс орны ашылмақ. Нақтырақ айтсақ, биыл рельс дәнекерлеу кәсіпорнын ашу, «Лиманное» кен орнын игеру, «Қазақстан Тәуелсіздігіне 10 жыл» шахтасының 2-кезеңін іске қосу, жүнді терең өңдеу және тоқыма емес материалдарды өндіру цехын салу, «Хромтау 1» жел электр станциясын салу сынды жобалар іске асырылады.Досжан Әлібеков облыста 2026-2028 жылдары жүзеге асырылуы жоспарланған жобалар туралы да ақпарат берді.

— Ақтөбе қаласындағы «Әлия Молдағұлова атындағы халықаралық әуежайы» базасын мультимодальды хабқа айналдыру мақсатында Үкіметтің қаулысымен биыл 8 қаңтарда жалпы аумағы 858 гектар болатын арнайы экономикалық аймағы құрылған-ды. Негізгі бағыттары —логистика және өңдеу өнеркәсібі. Сондай-ақ Хромтау қаласында жалпы аумағы 150 гектар болатын индустриялық аймақ құрылды. Облыстағы 2016 жылдан бастап жұмыс істеп келе жатқан  индустриялық аймақта 17 жоба іске асырылып, 546 жаңа жұмыс орны ашылды. Алдағы уақытта 8 жаңа жоба іске қосылып, 312 жұмыс орны ашылады, — дейді ол.

Қазақстан Республикасының инвестициялық саясатының2029 жылға дейінгі тұжырымдамасына және облыс әкімінің тапсырмасына сәйкес Индустриялық-инновациялық даму басқармасы2025-2027 жылдарға арналған инвестициялар тарту бойынша кешенді жоспар әзірлеген. Бұл жоспар аясында инвестициялар тарту, инфрақұрылымды дамыту, т.б. жұмыстарды іске асыру жоспарланған.

М.ТАБЫН.