Ақын қыздың ауылдағы кездесуі

Шығармашылық кеш

Жуырда ақын Гүлжайнар Қалдина Ырғыз ауданына келіп, шығармашылық кездесу кешін өткізді.

Шалқар ауданының Аққайтым ауылында туып-өсіп, Қ.Жұбанов атындағы Ақтөбе университетінен журналистік білім алып, облыстың өнер-мәдениет, баспасөз салаларында бірқатар қызметтер атқарған ақын қыз бүгінде Жазушылар одағының мүшесі, Тұманбай Молдағалиев атындағы әдеби сыйлықтың иегері және бірнеше республикалық байқаудың жүлдегері.

«Қазақ аналары-Дәстүрге жол» қоғамдық бірлестігі облыстық филиалының мүшесі Жұмагүл Омарбекова бастамашы болған сапарда Ырғызға ат басын тіреген шығармашылық иесі аудандық кітапханада талапкер жасөспірім жеткіншектерге «Жалын атсын жас талап» атты шеберлік сағатын өткізді.

«Арай» мәдениет үйінде кітап көрмесі ұйымдастырылып, «Өлең менің өзім және мекенім…» атты  кешке көрермен көп жиналды. Ақынның ойлы да нәрлі өлеңдерін залдағы көпшілік асқан ынтамен, бір деммен тыңдағаны байқалды.

Ырғыз ауданы әкімінің орынбасары Серік Қонақбаев жылы лебізін айтып, ақынға құрмет көрсетті.

Өз кезегінде Гүлжайнар Қалдина көптеген өлеңін сахнада оқып, Ырғыз еліне домбырамен арнау төкті. Кітапханашы қыздар ақынның «Мөлдірдің арманы» пьесасынан үзінді қойылым сахналады.

Аудан орталығындағы №1 қазақ орта мектебінің оқушылары жарасымды би билеп, ақыннның жырларын жатқа оқыды. Өз өлеңдерін жеткіншектер тебірене оқып жатқанда, ақын қыздың жанарында елге деген ризашылық пен жылу, ал жас ақындардың көзінде отты ұшқын бары сезілді.

Кеш соңында Ақши ауылының тұрғыны Айман Көкенқызы ақынға ақ тілегін білдірді. Ауыл аналары шашу шашып, той салтанатын жасады.

Әсерлі кеш Ы.Алтынсарин атындағы мектеп оқушыларының хор ұжымының орындауында ақынның сөзіне жазылған сазгер Нұрталап Жүсіповтің «Бақытты баламыз» атты әнімен қорытындыланды.

Руслан ҰЗАҚБАЕВ,

Ырғыз ауданы.