Тасқопалықтар жол жөнделгенін қалайды
Темір ауданының әкімі Жолдас Батырханның халыққа есеп беру кездесуі Тасқопа ауылдық округінде өтті.
Алдымен өткен жылы атқарылған жұмыстар айтылған дәстүрлі шарада былтыр округ орталығы — Теректі ауылына көгілдір отын беріліп, су желісі іске қосылғаны тілге тиек етілді. Пандемияға қарамастан, қолға алынған өзге де шаруалар жайы баяндалды.
Өз кезегінде тұрғындар Ақтөбе-Атырау республикалық тасжолы мен округ орталығын байланыстыратын жолды жөндеу туралы мәселе көтеріп, бұл — ауылдықтарды көптен бері толғандыратын түйткіл екенін жеткізді.
Аудан әкімі өз сөзінде аталған мәселені шешу мақсатында қазіргі таңда жергілікті бюджет есебінен жобалық-сметалық құжат әзірленіп жатқанын, ол дайын болғаннан кейін алдағы жылдары жол мәселесі толық шешілетінін айтты.
Айбек СЕРІК.
Темір ауданы.
