Шапағатты шақтың нұры

Ақтөбе қалалық Оқушылар сарайы ғимаратында Халықаралық әйелдер мерекесі қарсаңында Астана ауданы әкімдігінің ұйымдастыруымен «Әйел — әлемнің нұры» атты мерекелік кеш өтті.

Шараға әртүрлі салада еңбек етіп жүрген 300-ге жуық қыз-келіншек пен көпбалалы аналар қатысып, олардың 40-ы марапатталды.

Қалалық оқушылар сарайының өнерпаздары мерекелік көңіл күй сыйлап, кешке көрік бере түсті. Астана ауданы әкімінің орынбасары Сейтмағанбет Шілманов әйелдерді көктем мерекесімен құттықтап, Алғыс хаттар табыс етті.

— Бүгінгідей көңілді шақта барлықтарыңызды көктемнің алғашқы мерекесімен құттықтаймын. Барлық тіршіліктің бастауы, қайнар көзі — аналар, арулар, қыздар. Сіздерге зор денсаулық, жүздеріңізге күлкі, шаттық, отбасыларыңызға амандық тілеймін, — деді С.Шілманов құттықтау сөзінде.

Бұдан соң денсаулық сақтау, мәдениет саласының өкілдері, педагогтар, құқық қорғау органдарының қызметкерлері мен көпбалалы аналар марапатталып, оларға гүл шоқтары сыйланды.

Мерекелік шарада алғысқа бөленгендердің бірі — Шолпан Жүсіпова. Ол — Ақтөбе қаласындағы №9 «Бәйшешек» мектепке дейінгі ұйымының меңгерушісі.

— Осы салада еңбек еткеніме 15 жылдан асты. Бүгінгі мерекелік шараға арнайы шақыртумен келіп, құрметке бөленіп отырмын. Қуанышымда шек жоқ. Барлық аналарды, аруларды мерекемен құттықтаймын. Еліміздің болашағы саналатын тәрбиелі, білімді ұл-қыздарымыз аман болсын, — деді Шолпан Жүсіпова.

 Ақбота ҚАЛДЫБЕК.