Бірлестік мүшелері қайырымдылық жасады

Алғыс айту күнінде Қазақстан халқы Асссамблеясы Ақтөбе облыстық филиалының өкілдері қайырымдылық іс жасады.

Облыстағы 18 этномәдени бірлестіктің мүшелері өзара топ құрып, көпбалалы отбасыларды мерекемен құттықтап, сый-сияпат жасады. Атап айтсақ, аталған отбасылардың тұрмыс жағдайларын көріп, зерттеген өзге ұлт өкілдері оларға азық-түлік пакеттерін үлестірді. Сондай-ақ бір отбасының жеке өтініші бойынша олардың 5 жастағы баласына құрастырмалы ойыншық сыйлады.

• Бүгін елімізде Алғыс айту күні тойлануда. Сондықтан қазақ халқына мейірімділігі мен қайырымдылығы үшін алғысымды айтамын. Мен тұрып жатқан жеріме, Отаныма шексіз ризамын! — дейді 11-сынып оқушысы Анастасия Шейко өз тілегін білдіріп.
• Бүгінгі мерекеде әр бірлестік бір отбасын құттықтап, оларға өз ықыласымыз бен құрметімізді білдіріп жатырмыз. Бұл акцияны ұйымдастыру — біздің ортақ бастамамыз. Осы қайырымдылық шарасын жыл сайын дәстүрге айналдырып, мұқтаж жандарға, отбасыларға көмек қолын созсақ дейміз, — дейді «Дағыстан» этномәдени бірлестігінің төрағасы Даази Омаров.

    Инесса ФАДЕЕВА.