Таза туынды, келісті дүние
Құрметті Қажеке!
«Тар кезеңді» аса зор ықыласпен оқып шықтым.
Ел тәуелсіздік алғаннан бері тарихи тақырыпқа жазылған шығармалар аз болған жоқ.
Тарихи роман әрбір жазушыдан аса үлкен дайындықты, зор жауапкершілікті талап етеді. Өкінішке орай, кейде уақыттың, кейде білімнің, ал енді бірде данышпан Абай айтатын «ыждағат пен мехнаттың» кемдігінен сол шығармалардың шынайы тарихтан ауылы тым алшақ жататыны жасырын емес. Тіпті, мектеп оқушысы еркін меңгерген хрестоматиялық оқиғаларға арналған кейбір «тарихи» туындылардың тіні бостығы соншалық, жіптің ұшын тарта қалсаң, сюжеті саудырап шыға келеді.
«Тар кезеңге» зор дайындықпен келгендігіңіз алғашқы тараудан-ақ бірден көрініп тұр.
Әуелі Екатерина патшайым тұсындағы орыс тарихын егжей-тегжейлі зерттепсіз.
Бұл — орыс тарихшылары егжей-тегжейлі жазған тақырып. Менің бір байқағаным: Сіз Кеңес дәуіріндегі зерттеулермен шектеліп қалмай, кейінгі 20 жыл ішінде ресейлік тарихшылар ғылыми айналымға қосқан жаңа еңбектерді де зерделеп шығыпсыз.
Екіншіден, Екатерина заманындағы Санкт-Петербург тарихын, тіпті оның архитектуралық кескін-келбетіне дейін жан-жақты зерттегеніңіз көрініп-ақ тұр.
Үшіншіден, патшайым билік құрған тұстағы орыс қоғамының саяси-әлеуметтік жағдайы, әскери күш-қуаты, империя саясатына әсер етуші күштердің ара салмағы, фаворитизмнің жай-жапсарына дейін мұқият қарастырып, көз майын тамыза талай кітаптарды ақтарғаныңыз айқын аңғарылады.
Төртіншіден, орыс-түрік соғыстарының тарихын тым терең қазбаламасаңыз да көзіқарақты оқырман бірден байқайтын қалың бояу, әсерлі штрихтармен мәселенің түп-төркінін аша білгенсіз. Жалпы, романның бұл қырын қазақ прозасына Сіз әкелген тың тақырып ретінде бағалауға болады.
Бесіншіден, Қырым хандығының құлауы ғана емес, Ноғай ордасының ыдырауы, Қазан, Астрахань хандықтарының, Терістік Кавказ жұртының, тіпті Грузияның отарлануы да назарыңыздан тыс қалмапты. Әрине, қазақпен тағдырлас, қоңсылас елдер болғандықтан романның осы тұсын тарата түсуге болар еді (деректерді ықшамдап беруіңізге қарай қолда жеткілікті материал болғаны сезіліп тұр), бірақ тақырыптан ауытқымау үшін тым қысқа қайырғаныңыздың себебін де түсіндім.
Алтыншыдан, Сіз роман арнаған кезең Кіші жүз қазақтарының ғана емес, жалпы Қазақ қоғамы үшін өте күрделі кезең болып табылады. Бұл туралы ғылыми пікірдің өзі де әлі бір жүйеге түсе қойған жоқ.
Тәуелсіздік жағдайында жазылып, жарық көрген көне заманнан күні бүгінге дейінгі «Қазақстан тарихы» атты 5 томдық іргелі еңбектің 3-томындағы «Нұралы хан билік еткен жылдардағы Кіші жүздегі саяси жағдай (1749–1786)» атты параграфты мен жазған едім. Тақырыпты меңгерген тарихшы ғалым ретінде Нұралы хан билік құрған кезеңге Сіз берген көркемдік интерпретацияға толық қосыламын.
Жетіншіден, Нұралы ханның өзі өте қайшылықты тұлға. Атам қазақ айтса айтқандай-ақ, «жақсы әкенің аруағы жаман ұлды 40 жыл сақтаса», тура Нұралыны Әбілқайыр хандай әкенің аруағы хандық билікте тұп-тура 38 жыл сақтаған екен. Сондықтан Нұралы ханның Сіз сомдаған образы да ащы да болса ақиқат шындыққа негізделген деп ашық айта аламын.
Сегізіншіден, романда қанша отаршы болса да шведтің ақсүйек тұқымынан шығып, бекзат болмыс-бітімін сақтаған Игельстром сияқты жаңашыл тұлғаның образы да барынша шынайы сомдалған. Шындығында, орыстың надан помещигінің отбасында өсіп, ашықтан, ашық тонау, талан-тараж бен озбырлыққа негізделген саясат жүргізген өзімшіл Неплюевпен салыстырғанда Игельстром жүргізген реформа хандық билікті жойып, отаршыл аппараттың ықпалын күшейтуге бағытталса да қазақ қоғамын европалық жүйемен жаңартуға негізделген алғышарт қалыптастырды.
Тоғызыншыдан, Сырым батыр мен оның төңірегіне топтасқан Кіші жүздің игі жақсыларының портреттік галереясы да өте сәтті шыққан.
Портрет дегеннен шығады. Романның кейбір беттерін оқығанда Сіздің оқиғаны жіктеп, жіліктеп жазғаныңыз соншалық — авансценасы да, мизансценасы да қолмен қойғандай драмалық шығарма немесе киносценарий оқып отырғандай әсерде боласың. Бұл – автордың ерекше ұқыптылығының белгісі деп білемін.
Романда сол игі жақсылар қоныстанған өзіңіз айтатын «атакүлдік» мекендердің ойы мен қыры, суы мен нуы туған жер, өскен ортаға деген аса зор махаббатпен суреттелгенін ерекше атап өткен жөн деп білемін.
Романның байыпты, байсалды стилі де өте ұнады. Ұмытыла бастаған көптеген көне сөздерді тірілтіп, өзгеше реңкте орнымен қолданғаныңыз да сәтті шыққан.
Шағын хатта күрделі шығарма туралы барлық ой-пікірімді айтып шығу мүмкін болмас. Бәлкім, кейін кездескенде кеңірек пікірлесудің реті келер. Әзірге
айтарым: «Тар кезең» тәуелсіздік тұсындағы қазақ тарихи прозасының ешбір талассыз үлкен табысы деп білемін.
Тағы бір байқағаным: романның жалғасы бар сияқты. Кемінде тағы бір томға еркін жететін материал жинап, жоспар құрғаныңызды аңғарған сияқтымын. Тіпті, Бөкей мен Жәңгір билік құрған кезеңдерге де бір-бір томнан арнасаңыз, төрт томдық эпопея болып шығуы да ғажап емес. Толстойды оқып өскен қазақ ретінде «оған уақыт қайда» дегеніңізбен келісе қоймаспын.
Қалай дегенмен де, толымды тарихи роман дүниеге келіпті. Қойыртпа, қоспасы жоқ таза туынды. Көркем, келісті дүние.
Өзіңізге құтты, халқыңызға қайырлы болсын!
Оқырманы мол болғай!
Құрметпен,
Мұхтар ҚҰЛ-МҰХАММЕД.