Есті жырдың егесі
Әдеби кеш
Қалалық мәдениет сарайында философия ғылымдарының докторы (РҺD), Қазақстан Жазушылар одағының мүшесі, ақын-сазгер Есентүгел Әзидің «Табиғаттың тылсымы мен құс тіліне құштармын» атты шығармашылық әдеби-сазды кеші өтті.
Кешті мәдениет саласының үздігі Орал Байсеңгір жүргізді.
Өткен ғасырдың тоқсаныншы жылдарының бас шенінде қолына домбырасын алып, аламан айтыстың жүйріктерімен ат құлағын теңестіріп, өзінің өнердегі қарым-қабілетін ерте мойындатқандардың бірі — Есентүгел Амангелдіұлы болатын.
Оныңайтыс ақыны ғана емес, өңірімізден шыққан жыршы-жыраулардың ізбасары ретіндетөселген жыршы екенін ел жақсы біледі. Көмейінен құйылған жырларын қағаз бетіне түсіріп, «Сартоғай, саған мың сәлем!», «Көкбөрі» жинақтары жарық көрді. Жай кітап емес, жұрт сүйсініп оқитын дүниелер жазды. Қазақтың ақиық ақыны Есенғали Раушанов: «Есентүгелдің жаны батырлыққа, еркін ойлылыққа, рух асқақтығына құштар», — деп көзі тірісінде бағасын берген еді. Ақынның «Ақұшан» деп аталатын үшінші кітабы өзінің шығармашылық кешінде халыққа таныстырылды. Қазақстан Жазушылар одағының Ақтөбе облысы бойынша өкілі Бауыржан Құрманқұлов құттықтау сөз сөйлеп, одақ атынан Алғыс хат табыстады. Байғанин ауданының әкімі Айбек Көпеновтің құттықтауын аудан әкімінің орынбасары Руслан Обаевжеткізіп, «Байғанин ауданының дамуына қосқан үлесі үшін» төсбелгісімен марапаттап, иығына шапан жапты. Қала әкімі Азамат Бекеттің құттықтау хаты мен сый-сияпатынмәдениет және тілдерді дамыту бөлімінің басшысы Гүлжайна Бейсенғалиева табыстап, ақынға құрмет көрсетті. Ақынның айшықты әндерін сахна төрінде елімізге белгілі әнші Есет Сәдуақасов, Ғазиза Жұбанова атындағы филармониясының әншісі Нұржан Қаражанов орындады. Маңғыстаудан келген Сәрсенбай Рахманбердиев, «Ер Едіге» жыр мектебінің ұстазы Әділбек Сарин, айтыс ақындары Марат Ахметов, Оралбай Каметия, Қайнар Алагөзовтер жырдан шашу шашты.
Керегі не тіршілікте даңқтың,
Атақ-мансап арсыздықтың үлесі.
Арасында бесік пенен табыттың,
Адамдық пен надандықтың күресі, — деп жырлаған ақынның әдеби кеші көпшіліктің көкейінде жылы әсер қалдырды.
Талғат ТІЛЕУЛЕСОВ.
