Еліміз үшін ең маңызды оқиға
Темірлан МИРМАНОВ,
Алға аудандық жастар ресурстық орталығының басшысы,
аудандық мәслихат депутаты:
— Қазақстан Республикасының Конституциясында: «Мемлекеттік биліктің бірден-бір бастауы — халық. Халық билікті тікелей республикалық референдум және еркін сайлау арқылы жүзеге асырады, сондай-ақ өз билігін жүзеге асыруды мемлекеттік органдарға береді», — деп көрсетілген. Барлық зайырлы, демократиялық мемлекеттерде халықтың билігі әр адамның дауыс беру құқығының сақталуы арқылы, сайлау арқылы жүзеге асады.
20 қарашада біздің елімізде де Президент сайлауы өткелі отыр. Бұл — еліміздің болашақ даму бағдарын айқындайтын аса маңызды оқиға.Қазір еліміз жаңа саяси кезеңге аяқ басты. Биылғы сайлау да — соның бір көрінісі. Енді елімізде Президент жеті жыл мерзімге сайланады және бір адам бір реттен артық ел Президенті болып сайлана алмайды, яғни бір адамның қайта-қайта сайлануына басты заң — Конституция арқылы тыйым салынып отыр.
Еліміздің жаңа келбетін қалыптастыруда, маңызды реформаларды жүзеге асыруда әсіресе жастардың рөлі зор. Қашан да жастар — дамудың қозғаушы күші. Алдағы Президент сайлауына да жастарымыз бейжай қарамай, өз болашақтары үшін белсенділік танытады деп сенемін.
Барша жерлестерімізді өзініңКонституцияда көрсетілген құқығын пайдаланып, сайлауда дауыс беруге шақырамын.Ел болашағын бірге айқындайық!