Спиральді оқыту — сапалы нәтиже кепілі

Елбасымыз Нұрсұлтан Назарбаев «Еліміздің ертеңі бүгінгі жас ұрпақтың қолында, ал жас ұрпақтың тағдыры ұстаз қолында» деген еді.

Қазіргі таңда еліміздің білім беру жүйесіндегі реформасына түрлі жаңалықтар енгізілуде, жаңашыл, заманауи жобалар жасалуда. Солардың бірі — «Қазақстан Республикасы орта білім беру мазмұнын жаңарту» аясындағы жаңартылған білім беру жобасы. Бұл жоба «Спиральді оқыту» бағдарламасы деп те аталады.

Бағдарлама материалдары Қазақстан Республикасының жалпы білім беретін мектептеріне арнап әзірленген  мектеп пәндерінің  оқу бағдарламаларына, оқу жоспарларына және бағалау моделіне негізделген. Бұл бағдарлама республикада орта білім мазмұнын жаңарту аясында қайта қаралған оқу бағдарламаларын мектептерге енгізуге септігін тигізеді деген ойдамыз.

Жобаны ұйымдастырушы — «Назарбаев зияткерлік мектептері» ДББҰ және педагогикалық шеберлік орталығының әдістемелік кеңесі (2016 жыл). Жаңартылған білім беру бағдарламасын білім беру үдерісіне енгізу барысында «Өрлеу» біліктілікті арттыру ұлттық орталығы акционерлік қоғамының филиалы Ақтөбе облысы бойынша педагогикалық қызметкерлердің біліктілігін арттыру институты облыс педагогтарының біліктілігін арттыру курстарын ұйымдастырып отырады. Курс барысында топтарда тренерлер түрлі психологиялық тренингтер, қазақ тілі сабағында төрт дағдыға негізделген оқыту мен оқудағы заманауи стратегияларды қолдану арқылы курс тыңдаушыларымен топтық, жұптық, өзіндік жұмыстарды тиімді өткізеді. Тренердің қолданған барлық жаңашыл әдіс-тәсілдері мұғалімдерге берілген тапсырмаларды орындау барысында белсенділіктерін танытуына, қызығушылықтарының оянуына, практикалық жұмыстарды ынталы орындауға мол мүмкіндік беретіні анықталды.

Облыс педагогтері курс аясында аталмыш бағдарламаның еліміздің білім беру жүйесін дамытуға, жалпы Еуропалық стандарт негізінде болашақ ұрпақтың бәсекеге қабілеттілігін қалыптастыруға, тілдік дағдыларды толыққанды игеруге, сындарлы ойлау теориясы мен белсенді оқу стратегияларын тиімді қолданып, оқыту мен оқу үдерісін жақсартуға зор ықпал ететіндігін ұғынды.

Қысқасы, жаңартылған білім беру бағдарламасы 2016-2017 оқу жылынан бастап еліміздің барлық мектептеріне жаппай енгізіліп, сапалы нәтижеге қол жеткізуге мүмкіндік туады деп сенеміз.

Анаргүл СҮГІРБАЕВА,

аға оқытушы, педагогика ғылымының магистрі.

Әсел БАЙТЕНОВА,

№5 орта мектептің мұғалімі.