Діни бірлестіктерге қойылар талап бір
25 қазанда Қазақстан Республикасының «Діни қызмет және діни бірлестіктер туралы» заңына сәйкес діни бірлестіктерді қайта тіркеуге берілген бір жылдық мерзім аяқталады. Алайда аталмыш рәсімді өткізудің қажеттілігі туралы әлі күнге дейін айтылып жүр. Осыған орай Дін істері агенттігі төрағасының орынбасары Марат Әзілхановпен әңгімеміз қайта тіркеудің маңыздылығы және осы үдерістің барысы жайында өрбіді.
— Марат Алмасұлы, діни бірлестіктерді қайта тіркеу — дін саласындағы ең өзекті және көп талқыланып жүрген мәселелердің бiрi. Заңда бұл рәсім қалай бекітілген?
— 2011 жылдың 11 қазанында Мемлекет басшысы «Діни қызмет және діни бірлестіктер туралы» заңына қол қойды. Заң мәтіні осы жылдың 15 қазанында жарық көрді және 10 күн өткеннен кейін заңды күшіне енді.
Менің ойымша, аталған актіні қабылдау Қазақстан Республикасында мемлекеттік-діни қатынастарды дамытудағы жаңа бір кезеңді белгіледі. Жиырма жылдың ішінде «Діни сенім бостандығы және діни бірлестіктер туралы» бұрынғы заң қолданылған тұста қоғамдағы діннің рөлі күрт артуы жағдайында мемлекет пен діни қауымдардың өзара іс-қимыл жасауының қолданыстағы үлгісін жетілдіру қажет болды. Ал бұрын қолданылған құқықтық ережелер үнемі уақыт талабына сай болған жоқ.
Жаңа заңға енгізілген маңызды жаңалықтар ол діни бірлестіктердің мәртебесін нақтылайтын ережелер, сондай-ақ оларды тіркеу және қайта тіркеу рәсімі болып табылады. Заңның 24-бабына сәйкес діни бірлестіктер заң қолданысқа енгізілген күннен бастап бір жылдың ішінде жаңа талаптарға сәйкес өздерінің құрылтай құжаттарына өзгерістер енгізуге міндетті. Сонымен, бір мезгілде тіркеуші органға діни бірлестіктің мәртебесін растайтын құжаттар табыс етіледі. Осылайша бұл ережеде еліміздің аумағында қызмет ететін барлық діни бірлестіктердің қайта тіркеуден өтуі қарастырылған.
— Діни бірлестіктердің қайта тіркеуден өтуі үшін қандай құжаттар өткізу қажет?
— Қайта тіркеу үшін қажетті құжаттар тізбесі «Заңды тұлғаларды мемлекеттік тіркеу және филиалдар мен өкілеттіктерді есептік тіркеу туралы» заңда көрсетілген. Осы нормативтік актіге сүйенсек, заңды тұлға қайта тіркеу туралы тиісті өтінішті беруге міндетті.
Бұдан басқа, тіркеуші органға уәкілетті органның, яғни діни бірлестіктің жалпы жиналысының құрылтай құжаттарға өзгерістер мен толықтырулар енгізу туралы шешімі не шешімнің көшірмесі өткізіледі. Әдетінше бұл құжат жалпы жиналыстың хаттамасы үлгісінде ұсынылады.
Қайта тіркеу үшін ұсынылатын ең негізгі құжат заңнама талаптарына сай келтірілген діни бірлестіктің жарғысы. Сондай-ақ бюджетке заңды тұлғаларды мемлекеттік тіркеу үшін төлемді растайтын құжат ұсынылады. Сонымен қатар «Діни қызмет және діни бірлестіктер туралы» заңның талаптарына сәйкес діни бірлестіктерді құруға бастамашы азаматтар тізімдері беріледі.
Құрылтай құжаттарына дінтану сараптамасын әділ жүргізу үшін діни бірлестіктер діни ілімнің пайда болу тарихы мен негіздерін ашып көрсететін және осы ілімге сәйкес келетін діни қызмет туралы мәліметтер қамтылған діни баспа материалдарын (кітаптар) да өткізуге тиісті.
— Діни бірлестіктің жарғысына қандай талаптар қойылатынын нақты түсіндіріп кетсеңіз.
— Жарғы — діни бірлестіктің негізгі құжаты болып саналады, оның негізінде діни қызмет жүргізілетін болады. Міне, сондықтан осы құжаттың маңыздылығын ескере отырып, белгілі бір талаптар қойылған. Олар заңның 16-бабында толық жазылған.
Сонымен бірге жарғыда діни бірлестіктің атауына, қызметінің мәні мен мақсаттарына, орналасқан жерiне және оның шегінде өз қызметін жүзеге асыратын аумағына және т.б. қатысты бірқатар міндетті компоненттер болуы қажет. Бұдан басқа, аталған құжатта діни ілімнің және діни қызметтің негіздерін, сондай-ақ діни бірлестіктің негізгі діни идеялары мен қызметінің түрлерін ашып көрсететін мәліметтер қамтылуы тиіс.
Бұл жерде айтылуға тиіс мәселе, жарғыда діни бірлестіктің неке мен отбасына, білімге, осы діни бірлестік мүшелерінің және басқа да адамдардың денсаулығына, оның мүшелері мен қызметшілерінің конституциялық құқықтары мен міндеттерін іске асыруға көзқарасы қамтылуы маңызды.
Қайта тіркеу үдерісінде міндетті түрде жүзеге асырылатын дінтану сараптамасының нәтижесі жарғыда көрсетілген мәліметтерді толық және әділ ашып көрсетуге тікелей байланысты болып табылады.
— Марат Алмасұлы, діни бірлестіктер қайта тіркеуден өту үшін құрылтай құжаттарын дайындау кезінде тағы қандай құжаттарды ескеруге тиісті?
— Біріншіден, діни бірлестіктің атауы ұстанатын діні мен мәртебесін қамтуға тиіс.
Біз діндердің көптігін және олардың көптеген конфессиялар мен деноминациялардан тұратынын ескеріп, бірлестік атауларында ұстанатын дінін барынша дәл көрсетуді сұраймыз.
Екіншіден, тиісті мәртебені (республикалық, өңірлік немесе жергілікті) діни бірлестіктердің өздері мүмкіндіктеріне қарай белгілейді, мәртебе ұйымның толық атауында көрсетіледі.
Бірлестік атауы мемлекеттік органдардың, басқа да діни бірлестіктердің,
сондай-ақ Қазақстан Республикасының заңнамасын бұзуына байланысты тыйым салынған немесе таратылған діни бірлестіктердің атауын толық немесе оның елеулі бөлігінде қайталамауға тиіс.
Бұл жерде бір конфессиялық топтың діни бірлестіктерінің атаулары ұқсас болып, бірақ олар өздерінің қызметін жүргізетін аумақты белгілеумен ерекшеленуі мүмкін екенін айта кеткен жөн.
— Демек, діни бірлестіктерді қайта тіркеу жұмысына бірнеше мемлекеттік орган қатысады ғой.
— Әрине. Бірқатар мемлекеттік органдар өз құзыреті шеңберінде діни бірлестіктерді тіркеу және қайта тіркеу үдерісінде тиісті қызметтерді атқаруда.
Мемлекеттік тіркеуді және қайта тіркеуді тікелей әділет органдары жүзеге асырады. Бұл ретте республикалық діни бiрлестiктердi және өңірлік діни бірлестіктерді мемлекеттiк тiркеудi Әдiлет министрлiгi жүзеге асырса, ал жергілікті діни бірлестіктерді мемлекеттік тіркеуді, филиалдар мен өкілдіктерді есептік тіркеуді аумақтық әдiлет органдары жүзеге асыруда.
Алдымен діни бірлестіктер құрылтай және өзге де құжаттарын Халыққа қызмет көрсету орталықтарына ұсынуы тиіс.
Өз кезегінде, дін саласындағы уәкілетті мемлекеттік орган ретінде құрылған Дін істері агенттігі заңның 4-бабына сәйкес діни бірлестіктердің жарғыларына және өзге де материалдарына дiнтану сараптамасының жүргiзiлуiн қамтамасыз етедi.
Сондай-ақ біздің департаменттер басқа құзыретті органдармен өзара бірлесіп, діни бірлестіктерді құруға бастамашы азаматтар тізімдеріне тексеру жүргiзуде.
— Қайта тіркеу жұмысында қандай қиындықтар боп тұрады?
— Білесіз бе, құрылтай құжаттарына дінтану сараптамасын жүргізу кезінде кей жағдайларда, шынында да, құжатты мазмұны жағынан бағалау қиынға соғады. Әсіресе, діни бірлестіктердің жарғыларында олардың қызметінің мәні бойынша әртүрлі түсініктемелер жиі беріледі, мәселен, белгілі бір конфессиялық топ өзіне тән емес діни тәжірибелерді көрсетеді. Мәліметтерді бұрмалау фактілері және жалған деректерді пайдалану орын алады.
Кейде діни бірлестіктер өздерінің діни ілімін таныту үшін қажет болатын канондық және өзге де діни негіздердің орнына зайырлы еңбектердің санатына жататын дінтану бағытындағы материалдарды ұсынады. Ал кейбір діни бірлестіктер өз әдебиеттерін мүлдем өткізбейді, осылайша сарапшыларға сапалы сараптама жүргізу мүмкіндігі берілмейді.
Діни бірлестіктерді құруға бастамашы азаматтар туралы мәліметтерде жекелеген діни ұйымдар жалған деректерді де қосып жіберген. Мәселен, құрылтай тізімдерінде кәмелетке толмаған адамдар бар, ал бұл заңнаманы бұзушылыққа жатады. Сондай-ақ бірлестікті құру аумағында тұрмайтын және құрылтай жиналысына мүлдем қатыспаған адамдар да көрсетілген. Тіпті тізімдерде Қазақстанның азаматы емес, жай ғана елімізде тұрақты тұруға рұқсат алғандардың да енгізілуі орын алды.
Осы үдерістің басқа да тұстарымен қоса алғанда, бұл айтылғандар, әрине, материалдарды қарау мерзіміне теріс әсер етіп отыр.
— Аталмыш рәсімнен өтіп үлгермеген немесе өтуден бас тартқан ұйымдарды не күтіп тұрғаны жайында не айтар едіңіз?
— Жоғарыда айтылғандай, діни бірлестіктерге құрылтай құжаттарын заң талаптарына сәйкестендіру үшін бір жыл берілген болатын, 2012 жылғы 25 қазан ең соңғы күн болып есептеледі. Көрсетілген мерзім өткеннен кейін қайта тіркеуден өтпеген заңды тұлғалар мемлекеттік тіркеуді жүзеге асыратын органның жүгінуі бойынша сот тәртібімен таратылады. Яғни көрсетілген мерзім өткеннен кейін құрылтай құжаттарын заңнама талаптарына сәйкестендірмеген бірлестіктер қызметінің заңдылығы туралы мәселе туындайтын болады. Өкінішке қарай, қазіргі кезде діни бірлестіктердің біразы заңның осы талабын орындауға дайын болмай отыр.
— Діни бірлестіктерге заңнаманың қайта тіркеуге қатысты талаптары туралы мағлұмат берілген бе?
— Дін істері агенттігі және басқа да құзыретті мемлекеттік органдар бұл бағытта жаңа заң күшіне енген сәттен бастап үлкен ақпараттық-түсіндіру жұмысын жүргізіп келеді.
Заңнаманың тіркеу рәсімдері бойынша талаптарын түсіндіру діни бірлестіктердің өкілдерімен кездесу кезінде тікелей, сондай-ақ бұқаралық ақпарат құралдары арқылы да жүргізіледі.
Біздің Агенттіктің басшылығы мұсылман қауымының, православие, католицизм, түрлі протестанттық бірлестіктердің өкілдерімен ондаған кездесулер өткізді. «Иегова куәгерлері» діни бірлестігінің, иудей қауымының жетекшілерімен бірнеше кездесулер ұйымдастырылды. Сонымен қатар буддистік бірлестіктердің және «Кришна санасы қоғамының» өкілдеріне де тиісті түсіндірмелер берілген.
Бұдан басқа, Агенттіктің аумақтық органдары жергілікті жерлерде қолданыстағы заңнаманың ережелерін түсіндіру бойынша кездесулерді тұрақты өткізіп тұрады. Сондай-ақ өңірлердегі газет беттерінде тиісті хабарландырулар жарық көрді, ал діни бірлестіктердің жетекшілеріне жазбаша хабарлама-хаттар жіберілген.
— Осы кезге дейін қандай діни бірлестіктер қайта тіркеуден өтті?
— Ағымдағы жылдың 19 маусымында Қазақстан мұсылмандары діни басқармасы республикалық діни бірлестігі тіркеуден өтті. Қазір облыстарда оның филиалдарын есептік тіркеу үдерісі өтіп жатыр. Олардың жартысы тіркеуден өтіп те қойды, 300-ге жуығы тиісті шешімді күтуде, ал қалған бөлігі әділет органдарына өздерінің материалдарын өткізуге дайындық үстінде.
Сонымен қатар «Інжілдік-лютерандық шіркеуі» діни бірлестігі де қайта тіркеуден өтті. Қазақстандағы Православ шіркеуі өз құрылтай құжаттарын дайындап, өзінің жергілікті қауымдарын (приход) қайта тіркеуге кірісті. Одан басқа, Інжілдік христиан-баптистерінің одағына кіретін бірлестіктер құрылтай құжаттарын дайындап, оларды тіркеуші органдарға ұсынуды бастады.
Қазіргі таңда иудей қауымдары, буддизмнің, армян апостолдық шіркеуінің діни бірлестіктері және бірқатар протестанттық ұйымдар тіркеу рәсімінен өтуде.
Қызметі және құрылтай құжаттары заңнама талаптарына сәйкес келетін барлық діни бірлестіктер белгіленген мерзімде қайта тіркеуден өтеді. Бұл үшін агенттіктің және осы үдеріске қатысатын басқа да мемлекеттік органдардың барлық қажетті ресурстары бар. Тек діни бірлестіктер өз құжаттарын уақтылы өткізсе болғаны.
Сұхбаттасқан Мұрат Иманалиев.
«Айқын» газеті, тамыздың 30-ы, 2012 жыл.