Мерген қыздардың жеңісі
Ақтөбе қаласында Кеңес Одағының Батыры Әлия Молдағұлованың 100 жылдығына орай ұйымдастырылған «Мерген ару — 2025» республикалық ашық біріншілігі мәресіне жетті. Жалпы білім беретін мектеп оқушыларының арасында өткен жарысқа 14-17 жас аралығындағы 65-ке жуық мерген қыз қатысты.
Екі күнге созылған «Мерген ару — 2025» сайысында республикамыздағы жалпы білім беретін мектептерден жасақталған 16 команда өзара мықтыны анықтады.
— Жарыс тартысты өтті. Сайыс арнайы ереже бойынша жүргізілді. Әр облыс қатысушылары сайысқа өздерінің пневматикалық мылтығы және оқтарымен сақадай сай келді. Сайыс шарты бойынша қатысушылар түрегеліп тұрып, 10 метр қашықтықта оқты нысанаға дәл тигізуі қажет. Әрбір қатысушыға 13 рет атуға мүмкіндік берілді. Яғни оның үшеуі сынақ түрінде болса, қалғаны есепке алынды. Дүбірлі додаға қатысқандар арасында №51 мектеп-гимназияның жанынан құрылған Кейкі мерген атындағы «Жас сарбаз» әскери-патриоттық клубының тәрбиеленушілері Диляра Шайхиденова, Назым Хасенова, Лаура Базекеновалар бар. Аталған әскери-патриоттық клуб жастарға әскери білім беріп қана қоймай, олардың физикалық тұрғыда шынығуына мүмкіндік береді. Клубтың белсенді мүшелері маусым айында өтетін «Айбын» әскери-патриоттық жастар жиынына дайындалып жатыр, — дейді бірлестік төрағасы Бағдат Сағынбайұлы.
Сайыс барысында әр команда мылтық атудан мықтылығын көрсетті. Жекелей сында жүлдегер атанған Дильяра Шайхиденова бұған дейін «Мерген ару» байқауының облыстық кезеңінде жеңімпаз атанып, командалық және жекелей сында үздік нәтиже көрсеткен.
— Мен бұл байқауға жыл сайын қатысамын. Екі жылдан бері мергендіктің қыр-сырын үйреніп жүрмін. Осы жарыста қыздардың дайындығы жоғары деңгейде. Қарсыластарым бірінен-бірі өткен сұрмерген екен, — дейді ол.
Командалық есеп бойынша 1-орынды Қостанай облысының командасы жеңіп алса, жүлделі 2-орын — Ақтөбе облысы Астана ауданының командасына, 3-орын Ақтөбе облысы Алматы ауданының командасына бұйырды. Ал жекелей сында бақ сынаған қостанайлық және ақтөбелік арулар қарсылас шақ келтірмеді. Жекелей сында бақ сынаған қостанайлық Екатерина Белоусова бас жүлде алды. Ал 1-орын ақтөбелік Диляра Шайхиденоваға, 2-орын Аружан Жәдігероваға, 3-орын Назым Меңдіғалиеваға бұйырды.
Жеңімпаздар Кеңес Одағының Батыры Әлия Молдағұлованың облыстық мемориалды музейінің арнайы дипломдарымен, ақшалай сыйлықтарымен және медаль, кубоктарымен марапатталды.
Махамбет ЖАҚСЫЛЫҚОВ,
Ақтөбе гарнизоны баспасөз қызметінің бастығы.
