Айт күнгі айтулы жеңіс
Премьер-Лига
«Атырау»-«Ақтөбе» — 0:4
29-30 наурыз күндері 3-тур ойындары өтті.
«Астана» өз алаңында «Жетісуды» ойсырата ұтты, үш голдың да авторы — Марин Томасов.
Сырт алаңда «Қайрат» жеңіске жетті.
Бірінші таймда екі доп айырмашылығымен ұтып жатқан «Қайсар» қақпасына 89-минутта екінші допты кіргізіп алып, жеңістен айырылып қалды.
Жалпы, бұл турда 4 кездесу тең есептермен аяқталды.
* * *
Бұл турда «Ақтөбе» 30 наурызда — Ораза айт күні сырт алаңда «Атыраумен» ойнады.
Екінші турда көкшетаулықтардан жеңіліп қалған мұнайшылар командасы бұл турда есе қайтаруды ойлағаны даусыз. Оған қоса олар өткен жылғы чемпионатта біздің жерлестерімізбен екі рет тең ойнағандарын да ұмыта қоймаған болуы керек. Қалай болғанда да, биыл бапкері де, клуб басшылығы да, ойыншылар құрамы да жаңарған атыраулықтардың бұл кездесуде үш ұпай олжалағысы келгенін артық дәме деуге келмейтін.
Алғашқы бес минут ештеңеден де анық хабар бермеді. Доп екі команданың ойыншылары арасында кезекпе-кезек ұшып-қонып секірді де жүрді. Жанкүйерлер бұл кездесу де қызықсыз өтетін болды-ау деген ойға да келгендей болды.
Дегенмен бой сергітуге ұқсаған сол аз ғана уақыт өте бере нағыз футбол басталды да кетті. 8-минутта Ыдырыс Умаев айып алаңының шет жағынан айып добын орындады. Ол допты дәл қақпаның алдына әуелете тастады да, алаң иелері де, қонақтар да сол жерге ұмар-жұмар жинала қалды. Сол абыр-сабыр қимылдардың арасынан Уче Агбо саңылау тауып, допты қақпаға сүңгітіп жіберді — 1:0.
Бұдан соң атыраулықтар күшке мінді. Содан шамамен 20 минут бойы шабуылдаумен болды. Соның ішінде екі рет тура соққы жасап, біздің қақпашы Андрей Владтың шеберлігі арқасында ғана қақпаға доп енбеді. Әрине, ақтөбеліктер дес бере қойған жоқ. Қорғанысты шебер ұйымдастырған қонақтар тайм соңына таман және бір гол соқты. 38-минутта Амаду Думбия алдында бара жатқан Неманья Анджелковичке қолмен қойғандай етіп тамаша пас тастады да, серб футболшысы қақпаға қарата еңірете соққы жасады. Осы кезде оқтай ұшқан допты алаң сыртына жібермек болған атыраулық Гильерме Перайраның аяғына тиген доп лып етіп қақпаға енді де кетті. Тіпті атыраулық қақпашы бөгет жасауға ұмтыла да алмай қалды — 2:0.
Не десек те, бірінші тайм алма-кезек шабуылдармен, тынымсыз қимылдармен жанкүйерлерді риза етті.
Екінші таймда, әрине, «Атырау» есе қайтармақ болды. Бірақ бұған, бір жағынан, олардың шеберлігі жете бермеді, екінші жағынан, ойын алаңының сапасыздығы екі команданың да футболшыларына кедергі келтірумен болды. Жалпы, екінші таймда ойынның алдыңғы бөлікке қарағанда кәдімгідей қызықты болмауын алаңдағы көгалдың ойқы-шойқы болуымен түсіндіруге болатын шығар. Футболшылар сапасыз алаңмен салғыласып та шаршап қалған сияқты.
Ал үшінші гол 68-минутта соғылды. Кезекті шабуыл барысында Еркебұлан Сейдахмет сол қапталмен заулай жүгірді де, өзін өкшелеген екі футболшыны, оларға қосыла шауып алдынан шыққан және екі футболшыны қапы қалдырып, допты қақпаның дәл алдына келе қалған Джордже Ивковичке тастай салды. Алаң иелері қараусыз қалдырған Джордже аяғын тоса қойды да, қақпаның торын бүлк еткізді — 3:0.
Айтпақшы, бұған дейін де Еркебұлан «Атыраудың» қақпасына бір гол соққан. Бірақ қандай қате тапқанын кім білсін, төрешілер бұл голды есепке алмай қойған болатын. Соның есесін қайтарды жас футболшы.
Бұдан соң тағы бір жас футболшымыз жарқырай көзге түсті. Ойынның соңғы минуттарында Дархан Бердібек стадионды тағы бір дүр еткізді. Алаңның орта шенінде жүрген Оралхан Өміртаев қарсыластар футболшысының аяғында жүрген допты қағып түсті де, Дархан Бердібекке ысыра салды. Осыны күткен Дархан еш алаңсыз тіке қақпаға қарай тартты, жолын кес-кестемек болғандарға іркілместен қақпаға жақын келді де, бірден соққы жасады, соққының ақылмен жасалғаны соншалық — қақпашы Арсен Сиукаев қозғала да алмай, тұрған орнында қатты да қалды — 4:0.
«Ақтөбе» осылайша бұл кездесуден үш ұпай олжалап оралды.
«Атырау»-«Ақтөбе» — 0:4
Гол авторлары: Уче Агбо, 8-минут (1:0), Гильерме Перайра, 38-минут, автогол (2:0); Джордже Ивкович, 68-минут (3:0); Дархан Бердібек, 89-минут (4:0).
Ескерту қағазы көрсетілгендер: Гильерме Перейра, 32-минут («Атырау»), Уче Агбо, 23-минут, Богдан Вэтэжелу, 75-минут, Габи Кики, 77-минут («Ақтөбе»).
«Ақтөбе» төмендегі құрамда ойнады: Андрей Влад (қақпашы), Әлібек Қасым (капитан), Неманья Анджелкович, Габи Кики, Богдан Вэтэжелу, Риливан Рабиу, Уче Агбо, Амаду Думбия (Жан Жайро, 78-минут), Еркебұлан Сейдахмет (Дархан Бердібек, 71-минут), Ыдырыс Умаев (Фредди Гондола, 87-минут), Джордже Ивкович (Оралхан Өміртаев, 71-минут).
Резервте болғандар: Игорь Трофимец (қақпашы), Лев Скворцов, Саят Жұмағали, Бағдат Қайыров, Аян Байдәулетов.
Бас бапкер: Игорь Леонов.
30 наурыз 2025 жыл. Атырау қаласы, «Мұнайшы» стадионы.
* * *
Басқа кездесулер:
«Астана»-«Жетісу» — 3:0
«Тұран»-«Қайрат» — 1:2
«Қайсар»-«Оқжетпес» — 2:2
«Ұлытау»-«Жеңіс» — 1:1
«Тобыл»-«Елімай» — 1:1
«Ордабасы»-«Қызылжар» — 0:0
* * *
Біздің мергендеріміз:
Неманья Анджелкович, қорғаушы;
Еркебұлан Сейдахмет, жартылай қорғаушы;
Уче Агбо, жартылай қорғаушы;
Джордже Ивкович, шабуылшы;
Дархан Бердібек, жартылай қорғаушы.
Барлығы да бір голдан соқты.
* * *
Жерлестеріміз 3 кездесу өткізіп, 2 рет жеңді, 1 рет тең ойнады. Ұпай саны — 7. Доп айырмашылығы — 6-1.
* * *
3-турдан соң командалар турнир кестесінде төмендегіше орналасты.
1,2,3-орындарға 7 ұпайдан жинаған үш команда шықты: «Қайрат», «Ақтөбе», «Астана».
4-орында — 5 ұпайы бар «Тобыл».
5-6-орындарда — 4 ұпайдан жинаған «Елімай» мен «Оқжетпес».
7,8,9-орындардың иесі — 3 ұпайдан жинаған «Тұран», «Жеңіс» «Атырау».
10,11,12,13,14-орындарға 2 ұпайлары ғана бар «Қайсар», «Қызылжар», «Ұлытау», «Жетісу», «Ордабасы» жайғасты.
* * *
4-тур ойындары:
5 сәуір, сенбі:
«Елімай» — «Ұлытау»
«Оқжетпес» — «Тобыл»
«АҚТӨБЕ» — «ҚАЙСАР»
«Жетісу» — «Жеңіс»
6 сәуір, жексенбі:
«Атырау» — «Қайрат»
«Қызылжар» — «Тұран»
«Астана» — «Ордабсы»
Ертай АШЫҚБАЕВ.
