Жекпе-жек сарайында Наурызнама онкүндігі аясында ұлттық спорт пен дәстүрлі мәдениетті дәріптейтін ерекше іс-шара өтті.
Ұлттық рухты көтеретін спорттық іс-шараны басынан аяғына дейін облыс әкімінің орынбасары Жолдас Батырхан, бокстан 2003 жылғы Әлем чемпионы, Қазақстан Республикасына еңбек сіңірген спорт шебері Галиб Жафаров, қазақ күресінен әлемнің екі дүркін чемпионы Бақтыбай Қисықов тамашалады.
Облыстық денешынықтыру және спорт басқармасы басшысы Мейрамбек Махамбетовтің айтуынша, бүгін облыс аумағындағы 12 ауданда Наурызнама онкүндігі аясындағы «Ұлттық спорт күніне» орай ұлттық спорт түрлерінен
— Ел Президенті Ұлттық құрылтайда ұлттық құндылықтарға, соның ішінде ұлттық спорт түрлеріне ерекше көңіл бөліп, атап өтті. Соңғы жылдары облысымызда ұлттық спорт түрлері жақсы дамып келеді. Мәселен, аударыспақ, тоғызқұмалақ, қазақ күресінен Ақтөбе спортшылары тек ел деңгейінде емес, әлемдік деңгейде ірі жеңістерге қол жеткізіп жатыр. Көкпар да қарқынды даму үстінде. Бәйге өкілдері де мықты. Алдағы уақытта да осы бағытта жұмыстарды күшейтетін боламыз, — дейді облыстық денешынықтыру және спорт басқармасы басшысы Мейрамбек Махамбетов.
Бұл күні қатысушылардың бәрі де ұлттық нақышта киініпті. Әуелі қазақ күресінен бағын сынауға ниеттілер арасында жеребе таратылды. Спорттық іс-шараның ашылу салтанатында спорт саласының ардагері — Қазақстанның түйе палуаны, еліміздің еркін күрестен спорт шебері Шынбай Снадинов жарысқа қатысушыларға сәттілік тілеп, ақ батасын берді.
Іс-шарада алыстан көздеп, асықты дәлдеп атқандар да өзара мықтыларын анықтаса, ләңгі тепкендер дәлдік пен ептіліктерін сынады. Қазақ күресінде бағын сынаған лақап аты бар палуандар көрерменге мерекелік көңіл күй сыйлап, жақсы ойын көрсетті. Қазақ күресі 80 келіден жоғары салмақтағылар арасында өткізілді. Мұнда жүлде қоры — 350 мың теңге болды: үздік көрінген түйе палуанға — 200 мың теңге, екінші орынға — 100 мың теңге, үшінші орынға 50 мың теңге тігілді.
Арқан тартысқа шыққан алғашқы жұптың ойыны тартысты өтіп, жанкүйерлердің қошеметіне ие болды. Ал Ақтөбе қаласындағы интеллектуалдық спорт түрінен облыстық мамандандырылған балалар-жасөспірімдер спорт мектебінің оқушылары өзара тоғызқұмалақ ойнап, сайысты.
Аулада этноауыл көрмесі ұйымдастырылған. Мұнда киіз үй тігілген, сол маңда керуен мен көшпелі өмір салтының белгісіндей түйе жүр, жылқы мен тазы да осында. Қала тұрғындары көрмеге келіп, түйенің, жылқының, тазылардың қасында тұрып, естелік суретке түсіп жатты. Біз көрмеге тазыларын әкеліп тұрған «Құмай тазы» облыстық қоғамдық федерациясының президенті Оралбек Мақатовпен әңгімелестік.
— 2022 жылдың желтоқсанында облыстық «Құмай тазы» федерациясы құрылды. Оған дейін 2014 жылы тазы баптаушылардың чаты құрылған болатын. Ол жерде 100-ге жуық адам отыр. Үш жыл бұрын облыста 443 тазы болды. Бүгінгі таңда өңірде 700-дей тазы бар. Тазы ұстайтындардың үлкенінің жасы 60-тан асқан, кішісінің жасы 15-20-да. Бізде Ақтөбеде құмай тазының екі түрі де бар, шашақты және жарғақ.
Былтырел Президенті Қасым-Жомарт Тоқаевтың ықпалымен Қазақстан — ресми түрде тазы тұқымының иесі атанды.Негізі,тазы тұқымды итке 4 ел патент алғысы келді, олар: қазақтар, түріктер, қырғыздар, орыстар. Біздің тазы әмбебап болғандықтан, барлығының алдын орап, патентке ие болдық. Енді бұл өзіміздің төл тазымыз!Былтыр еліміздің Президенті төл тазымыздың екеуін Франция Президентіне сыйлады. Мемлекет басшысы кешегі Бурабайда өткен Ұлттық Құрылтайда да тазы тұқымының иесі — біздің ел екенін атап айтты. Бес мың жылдан бері өмір сүріп келе жатқан тазы — әмбебап, оған бірдеңе үйретудің қажеті жоқ. Аптасына екі рет тазыларымды ертіп, саятшылыққа шығып тұрамын, — дейді тазы баптаушы Оралбек Мақатов.
Есік алдында білектілердің бір тобы армрестлингтен, яғни қол күрестен бағын сынап жатты.
Айнұр ІЛИЯСҚЫЗЫ.
