Мерген қыздар сайысы
Ақтөбе қаласында Кеңес Одағының Батыры Әлия Молдағұлованың туғанына 100 жыл толуына орай жалпы білім беретін мектеп оқушыларының арасында пневматикалық мылтықтан нысана көздеп ату бойынша «Мерген ару — 2025» республикалық ашық біріншілігі басталды. Дүбірлі додада Қазақстанның түкпір-түкпірінен жиналған 64 қатысушы бақ сынайды. Қатысушылар — 14-17 жас аралығындағы қыздар.
Жарыс шымылдығын «Әлия гүлі» би ансамблі ашты. Ең алдымен жиналғандар сұм соғыста кеудесін оққа тосқан батырларымыздың рухына тағзым етіп, бір минут үнсіздікпен еске алды.
Іс-шараның ашылу салтанатында облыстық қорғаныс істер жөніндегі департамент бастығының тәрбие және идеологиялық жұмыстар жөніндегі орынбасары Ерлан Рамазанов сөз сөйлеп, сайыс қатысушыларына сәттілік тіледі.
— Өңірде «Мерген ару» сайысы 2003 жылдан бері дәстүрлі түрде ұйымдастырылып келеді. Бүгінгі сайысқа республикамыздағы жалпы білім беретін мектептерден жасақталған 16 команда қатысып отыр. Іс-шараның басты мақсаты —Әлия Молдағұлованың ерлігіне тағзым етіп, жасөспірімдердің әскери-қолданбалы спорт түрлеріне деген қызығушылығын арттыру. Ашық біріншілікте облыс намысын қорғайтын ақтөбелік мерген қыздарымыздың дайындығы жоғары деңгейде. Ақтөбелік команда сапында қаламыздағы №1, №55, №33, №78 мектептердің сайыпқыран оқушылары бар, — дейді ол.
Әскери патриоттық жарыстың бас төрешісі, алғашқы әскери және технологиялық дайындық пәнінің әдіскері Серік Аманжолұлының айтуынша, Отан үшін от кешкен жауынгерлердің ерлігін ұлықтау мақсатында ұйымдастырылған сайыс жыл сайын ауқымын кеңейтіп келеді.
— Майданда ерлікпен қаза тапқан жерлесіміздің ерлігі ешқашан ұмытылмайды. Әлия Молдағұлованың ерлігі мен Отанға деген адалдығы туралы естеліктер — болашақ ұрпаққа тәлім болар құнды қазына. Сайысқа әр облыстан іріктелген мерген қыздар келді. Қатысушылар топтық және жекелей жарыста сынға түседі. Жеңімпаздар Кеңес Одағының Батыры Әлия Молдағұлованың облыстық мемориалды музейінің арнайы дипломдарымен, ақшалай сыйлықтарымен және кубоктарымен марапатталады, — дейді бас төреші.
Жарыс алдында қатысушылар батыр қыз Ә.Молдағұлованың мемориалды ескерткіш кешеніне гүл шоқтарын қойып, тағзым етті. Дүбірлі додада сынға түсіп жатқан қатысушының бірі Аяжан Бақытова бұл сайысқа Қызылорда облысынан арнайы келген.
— Жарыс екі күнге созылады. Жыл сайын мерген қыздар арасында өтетін сайыстан тысқары қалмаймын. Қатысушылар белгіленген нысан бойынша 7-8 метрлік қашықтықтан түрегеп тұрып, пневматикалық винтовкадан ашық көздеу арқылы сайысып жатыр. №55 орта мектеп-гимназиясында өтіп жатқан сайыста мерген қыздар шеберліктерін көрсетіп, өзара бақ сынауда, — дейді жарыс қатысушысы.
Жарыстың жабылу салтанаты бүгін Шығармашылық академиясында өтеді.
Ақмарал МҰҚАШЕВА.
