Басты мақсат — сайлаушылардың сенімін ақтау

Облысқа жұмыс сапарымен келген Орталық сайлау комиссияның төрағасы Нұрлан Әбдіров Қ.Жұбанов атындағы Ақтөбе өңірлік университетінің Студенттер сарайында жастар ұйымдарының өкілдерімен, сондай-ақ облыстық тарихи-өлкетану музейінде мемлекеттік органдардың басшыларымен кездесу өткізді.

Кездесуде Нұрлан Әбдіров жастарға 2022 жылы оң өзгерістер енгізілген сайлау жүйесінің ауқымды трансформациясы туралы егжей-тегжейлі айтып берді. Сондай-ақ өткен жылдары елімізде өткен сайлау науқандарына, сайлау жүйесін дамытудың өзекті трендтеріне, комиссия жұмысын дамытудың стратегиялық перспективаларына тоқталды.   — Біз үшін ең басты құндылық — сайлаушы. Сондықтан сайлаушының дауыс беруіне толыққанды жағдай жасау және оларды ақпараттандыру біздің тікелей міндетіміз және біздің басты басымдығымыз — сайлаушылардың сенімі. Ал елдің жаңартылған сайлау жүйесі азаматтардың сайлау процестері арқылы мемлекетті басқаруға қатысуын кеңейтуге бағытталған, — деді ол.

Кездесуде сондай-ақ лекторалды науқандар, Орталық сайлау комиссиясының даму стратегиясы, комиссия жанындағы диалог алаңдары, басқа елдерде өтетін сайлаулар мен референдумдарды халықаралық байқау мәселелері де айтылды.

Басқосуда жастар QR-кодын пайдалана отырып, сайлаудың өзекті мәселелері бойынша дәстүрлі онлайн сауалнамаға қатысты. Бұдан бөлек сайлау тақырыптары бойынша жастар арасында пікірталас та ұйымдастырылды.

Бұдан кейін Нұрлан Әбдіровтің төрағалығымен облыстық тарихи-өлкетану музейінде шығып қалған мәслихат депутаттарының орнына сайлау өткізу мәселелері бойынша кеңес өтті.

— Биыл 30 наурызда республикамыздың 14 өңірінде шығып қалған 35 депутаттың орнына жаңа депутаттарды сайлау өтеді. Бұл сайлауда жергілікті тұрғындар кандидаттарға өз дауысын береді. Облысқа келген сапарымыз аясында сіздердің осы сайлауға дайындықтарыңызды бақылап, өз көзімізбен көруге келдік. Бұған дейін біз төрт облысқа барып, осындай басқосулар өткіздік. Атап айтсақ,осы 35 мандаттың алтауы Ақтөбе өңіріне тиесілі. Олардың қатарында бір облыстық, бір қалалық және 4 аудандық мәслихат депутатының мандаты бар. Бұл жолы сайлау өңірлерде жаңғыртылған сайлау жүйесі аясында өткізілмек. Мәселен, бұрын шығып қалған орынға депутаттарды партия бекітіп, ұсынатын болса, енді әрбір босап қалған бір мандатты депутаттың орнына толыққанды сайлау жүргізіледі, — деді Нұрлан Әбдіров.

Оның айтуынша, бүгінде республикамызда 85 мыңнан астам комиссия мүшесі болса, соның 800-і ғана кәсіби деңгейде жұмыс істейді. Ал қалғаны — басқа қызметтегілер. Осыған байланысты қазір 20 өңірдің 14-інде комиссия мүшелері оқытып жатыр.

— Облыста сайлау Ақтөбе қаласында және Қобда, Мұғалжар, Шалқар аудандарында өтеді. Сайлауға 5 аумақтық, 6 округтік, 21 учаскелік сайлау комиссиясы жұмылдырылады, — деді ол.

Жиында сайлауға дайындық бойынша жүргізіліп жатқан жұмыстар туралы облыс әкімінің орынбасары Жолдас Батырхан, облыстық жұмыспен қамтуды үйлестіру және әлеуметтік бағдарламалар басқармасының басшысы Ләззат Оразбаева және облыс прокурорының орынбасары Абзал Гилим баяндама жасады.

— Қазір өңірімізде су тасқынына қарсы іс-шаралар күшейтілген режимде жұмыс жасап жатыр. Былтыр 4 ауданда төтенше жағдай тіркелсе, биыл осындай қауіптің алдын алу үшін барынша қамданып жатырмыз. Облыста биыл сайлау өтетін 21 учаскенің 20-сы Ақтөбе қаласы мен аудан орталықтарында орналасқан. Бұл елді мекендерде су басу қаупі жоқ. Қобда ауданында сайлау аудан орталығынан 20 шақырым қашықтықтағы Құрсай ауылында өтеді. Ол жерде жол қатынасы бар, учаске толық жасақталған. Жалпы, біз 30 наурызда өтетін сайлауға толыққанды дайынбыз, — деді Жолдас Батырхан.

Комиссия төрағасыжауапты тұлғаларға заңнама талаптарына сәйкес сайлауды өткізуді, сайлау процесінің барлық кезеңінде жариялылық пен ашықтықты, қоғамдық қауіпсіздікті қамтамасыз етуді,су тасқыны жағдайында қосымша сайлауды қалыпты түрде өткізу мақсатында барлық қажетті шараларды қабылдауды тапсырды. Сондай-ақ кеңесте аумақтық сайлау комиссияларының материалдық-техникалық базасын жақсарту, сайлау комиссиялары құрамдарының кәсіби біліктілігін арттыру мәселелері де қаралды.

Жұмыс сапарының соңында Нұрлан Әбдіров бастаған топ Қобда ауданына барды.

Қобда ауылындағы №1, №4 округтік сайлау комиссияларын және №414, № 417 сайлау учаскелерін аралап, олардың  дауыс беруге дайындықтарын көрді. Сондай-ақ аудандағы жас сайлаушылармен кездесіп, олардың сауалдарына жауап берді.

Данагүл ҚАЗИХАН.