Былтыр өңірде 42 ауылдық округ әкімінің сайлауы өтіп, 15 мәслихат депутаты қайта сайланған. Бұл науқан барысында көктемгі су тасқынына байланысты бірқатар қиындықтар болған.
Өткен жылдағы жұмысын қорытындылаған облыстық сайлау комиссиясының төрағасы Нұрлыбек Жүсіпов ауыл әкімдерінің сайлауына 12 аудандық аумақтық сайлау комиссиясы мен107 учаскелік сайлау комиссиясы жұмылдырылғанын атап өтті.
— 42 сайланған ауылдық округ әкімінің 22-сі Аmanat партиясынан болса, қалғандары — өзін-өзі ұсынушылар. Сайлау құқығы бар 73115 сайлаушының 41 пайызы аталған науқанға қатысты. Сонымен қатар өткен жылы облыс аумағында 15 мәслихат депутатының өкілеттілігінің мерзімінен бұрын тоқтатылуына байланысты аталған округ аумақтарында кезектен тыс 2 рет сайлау өткізілді. Ал АЭС салу мәселесі бойынша республикалық референдумға облыс бойынша 571423 сайлаушының 428032-сі, яғни 74,9 пайызы атсалысты.
Көктемгі су тасқынымен тұспа-тұс келген сайлау кезінде Сарыбие ауылындағы №404 сайлау учаскесіне бюллетеньдерді аудандық аумақтық сайлау комиссиясы Ойыл орман шаруашылығының МТЗ-925 тракторымен жеткізсе, Ойыл ауылының іргесіндегі көпірді су шайып кетуіне байланысты Ақжар, Көсембай ауылдарындағы №412,413 сайлау учаскелеріне бюллетеньдер Ақтөбе әскери әуе институтының тікұшағымен Ойылдан Ақтөбе қаласына жеткізіліп, одан көлікпен Саралжын ауылына, әрі қарай трактормен Ақжар, Көсембай ауылдарына апарылды. Сол сияқты Құмжарған ауылындағы №396 сайлау учаскесіне бюллетеньдер моторлы қайықпен өткізілді. Бұның бәрін айтып отырған себеп — қиындықтарға қарамастан, сайлау комиссиялары мүшелерінің қажырлы еңбегінің арқасында сайлау өз деңгейінде, заң талаптарына сай өткізілді, — дейді Нұрлыбек Жүсіпов.
Жалпы, облыс бойынша барлық сайлау комиссиясының4467 мүшесі бар.
Өткен жылғы сайлау үдерісіндегі жаңалық — сайлаушыларға арналған шақыруларға арнайы QR-кодтың енгізілуі. Республикалық референдум барысында алғаш қолданылған бастама сайлаушылар арасында қолдау тауып, бұл ауылдық округ әкімдері сайлауы кезінде жалғасын тапқан.
— Облыстық сайлау комиссиясының негізгі міндеттерінің бірі —бұл істегі кәсіби құзыреттілікті арттыру, сайлау процесіне қатысушылардың электоралдық даярлығын арттыру.
2024 жылы облыста 329 оқыту семинары өткізіліп, оған 7145 адам қатысты.
Сайлау учаскелерінде тәртіп ережелерін бұзу, тіркеуді жою, учаскеден шығару фактілері тіркелген жоқ, — дейді облыстық сайлау комиссиясының төрағасы.
Ресми деректерге сүйенсек, облыста барлығы 2426 мүгедектігі бар сайлаушы бар.Атап айтсақ, арбамен жүретіндер —937, көру қабілеті бұзылғандар —764, есту қабілеті бұзылғандар —725. Барлық сайлау учаскесінде жоғарыда аталған топтағылар үшін кабиналар, сондай-ақ компьютерлер, құлаққаптар, үлкейткіштер, аудиобюллетеньдер, трафареттер қарастырылған.
Айбек СЕРІКҰЛЫ.
