Дала өртімен күрес: Ақтөбе облысында өрт сөндіру бекеттерінің саны артып келеді
Өңір басшысы Асхат Шахаровтың төрағалығымен өткен аппарат мәжілісінде дала және орман өрттерінің алдын алу шаралары талқыланды.
Төтенше жағдайлар департаменті бастығының орынбасары Айбат Жанабергенов облыста өрттердің алдын алу және жою үшін өрт сөндіру бекеттерінің саны артып келе жатқанын алға тартты. Биыл облыс орталығындағы Құрайлы, Сазды және Ақшат тұрғын алаптарында және Әйтеке би ауданының Ұлғайсын және Сарат ауылдарында, Темір ауданының Саркөл ауылында алты жаңа бекет орнатылды. Тағы алты пост ашу жоспарлануда.
Облыста 178 елді мекенді қамтитын 73 бекет иелігінде 58 бірлік өрт сөндіру және 28 бірлік қосалқы техника бар. Тиімді жұмыс істеу үшін қосымша 26 бірлік арнайы өрт сөндіру техникасы қажет. ТЖД бекеттерін қамтамасыз ету аясында олардың балансына он автоцистерна берілмек.
«Елді мекендерде дала өрттерінің алдын алу және сөндіру үшін 14 ерікті өртке қарсы құрылымдар бірлестігі құрылды, оның құрамында 1912 адам бар. Тәулік бойы 180 қызметкер және 37 ТЖД автоцистернасы дайындықта болады. Жедел байланыс үшін 16 бірлік спутниктік аппарат, ал аэровизуалды бақылау үшін 4 дрон қолданылады. 228 адамнан тұратын 39 мобильдік топ құрылды, олар 5 рейд жүргізді, соның нәтижесінде өрт қауіпсіздігі талаптарын бұзған 12 адам әкімшілік жауапкершілікке тартылды», – деді ТЖД басшысының орынбасары.
Айбат Жанабергенов атап өткендей, облыстың орман шаруашылығы мекемелерінде жеті орман өрт сөндіру станциясы жұмыс істейді. Қосымша жеті станция қажет: үшеуі салынып жатыр, тағы төртеуі – жобалау кезеңінде. Сондай-ақ өрт сөндіру техникасы паркін жаңарту және өрт гидранттарын күрделі жөндеу керек.
Бірқатар аудан әкімдері де атқарылып жатқан шаралар туралы есеп берді.
Жиын қорытындысы бойынша облыс әкімі өртке қарсы іс-шараларды күшейтуге қатысты тапсырмалар берді. Атап айтқанда, ол өрт қаупі бар аймақтарда қосымша профилактикалық рейдтер ұйымдастыру және ауылдық жерлерде өртке қарсы талаптардың сақталуын бақылауды күшейтуді тапсырды. Сондай-ақ, өңір басшысы орман өрт сөндіру станцияларының құрылысын жеделдетуге және өрт сөндіру техникасын уақытылы жаңартуды қамтамасыз етуге пәрмен берді.
А.ІЛИЯС.
