Қаламгерлер ойнаған дәстүрлі турнир

«Ақтөбе Медиа» ЖШС-ныңбаспасөз клубында Жеңістің 80 жылдығы және қазақтың батыр қызы Әлия Молдағұлованың туғанына 100 жыл толуына орай интеллектуалдық ойындардың тоғызқұмалақ, шахмат, дойбы түрлерінен дәстүрлі турнир өтті.

Қазақстан Журналистер одағы мен Қазақстан Жазушылар одағының облыстық филиалдарының ұйымдастыруымен және облыстық денешынықтыру және спорт басқармасының қолдауымен өткізілген іс-шараға ақын-жазушылар, бұқаралық ақпарат құралдары өкілдері қатысты.

Жарыстың ашылу рәсімінде әуелі «Ақтөбе Медиа» ЖШС директоры, Журналистер одағының облыстық филиалының төрағасы Раукен Отыншин сөз сөйледі.

— Биыл — Жеңіске 80 жыл, Әлия Молдағұлованың туғанына 100 жыл. Осыған орай Журналистер одағы мен Жазушылар одағының облыстық филиалдары бірлесіп дәстүрлі спорттық жарысты ұйымдастырып отырмыз. Мақсатымыз — батырларымыздың рухына тағзым ету арқылы журналистер мен жазушылардың шығармашылық белсенділігін арттыру.

Наурыз айы Алғыс айту күнінен басталды. Кеше ғана Халықаралық әйелдер күні мерекесі өтті. Енді Ұлыстың ұлы күні — Наурызды қарсы алмақпыз. «Салт-дәстүр — сарқылмас байлығымыз» тақырыбында іс-шара өткіземіз. Жарысқа қатысушыларға сәттілік тілейміз, — деді Раукен Отыншин.

Одан соң сөз сөйлеген Қазақстан Жазушылар одағының облыстық филиалының төрағасы Бауыржан Құрманқұлов:

— Бұл жарыс бірінші рет өтіп жатқан жоқ. Әлдеқашан дәстүрге айналды. Былтыр да Жазушылар одағы мен Журналистер одағының облыстық филиалдары бірлесіп, шахматтан турнир өткізгенбіз. Биылғы дәстүрлі жарысқа қатысуға жиырмадан астам қаламгерден өтініш түсті. Мұндай сайыстар алдағы уақытта да өткізіліп тұрады деген ойдамын, — деді.

Турнир басталмас бұрын төрешілер қатысушыларға ойынның ережелерін таныстырды.

Жүлдеден үміткерлер үстелдеріне жайғасып, шахмат, дойбы, тоғызқұмалақ ойнап, өзара сайысты. Әр ойыншыға 20 минут уақыт берілді.

Ойыншылар бар ынта-жігерін салып ойнады. Айналмалы жүйеде өз кезегін күтіп, демалып жүргендерге  ыстық шай мен тәттілер ұсынылды.

Тоғызқұмалақтан өткен сайысқа халықаралық дәрежедегі спорт шебері, әлемнің және Азияның күміс жүлдегері, Көшпенділер ойындарының жеңімпазы Мөлдір Серікқызы, ал шахмат пен дойбы ойындарына интеллектуалдық спорт түрлерінен мамандандырылған балалар-жасөспірімдер спорт мектебінің шахматтан жаттықтырушы-оқытушысы Айдос Бекетов төрелік етті.

Жарыс қорытындысы бойынша шахматтан барлық қарсыласын ұтқан облыстық «Ақтөбе» телеарнасының жүйелік әкімшісіАрман Қошқарбаев чемпион атанды. Екінші орынғаҚазақстан Жазушылар одағының облыстық филиалының төрағасы Бауыржан Құрманқұлов, ал үшінші орынға облыстық «Ақтөбе» газетінің бас редакторы Сәтжан Дәрібай ие болды.

Ал дойбыдан сайысқа түскендер арасында редакциямыздың ардагері, ақын-журналист Жақсылық Айжан топ жарып, І орынды жеңіп алды. Екінші орынға «Үш таған» журналының бас редакторы Ертай Ашықбаев ие болса, үшінші орынды «Ақтөбе Медиа» ЖШС қызметкері Талғат Тілеулесов иеленді.

Тоғызқұмалақтың тастарын санаудан жаңылыспаған «Ақтөбе» газетінің беттеушісі Шолпан Мұхамбеталина үздік көрініп, бірінші орынға ие болды. Ал екінші және үшінші орын жүлделеріне «Ақтөбе Медиа» ЖШС қызметкері Лаура Базарбай мен облыстық «Ақтөбе» газетінің тілшісі Айнұр Жалмағанбетова ие болды. Жеңімпаздар мен жүлдегерлерге дипломдар мен ақшалай сыйлықтар табысталды.

Жарыс соңында біз төрешілердің де пікірін білген едік.

Айдос Бекетов:

— Айналмалы жүйеде өткен жарыс жоғары деңгейде өтті. Ойыншылар соңына дейін барын сала ойнады. Шахматшылар арасында жеңімпаз атанған жігіт барлық ойынды жеңіліссіз өткізді. Дойбышылардың да ойыны тартысты болды. Соңында есеп тең болған кезде мықтыны анықтау үшін тағы бір ойын өткіздім, — деді.

Мөлдір Серікқызы:

— Басқа жерлерде төреші болып жүрмін. Бірақ ақын-жазушылар мен тілшілер арасында өткен жарысқа бірінші рет төрелік еттім. Мұнда тоғызқұмалақ ойыны айналмалы жүйеде өтті. Жарыстың соңына дейін кімнің жеңімпаз болатынын білмедік. Себебі, көш бастап келе жатқан ойыншы соңғы айналымда жеңіліп қалды. Сондықтан жүлделі орындарға да талас қызу болды, — деді.

Айнұр ІЛИЯСҚЫЗЫ.