Облыс әкімі алғашқы сенбілікке қатысқан ақтөбеліктерге ризашылығын білдірді
Ақтөбеде өткен жалпықалалық сенбілікке тұрғындар, белсенді азаматтар, әкімдік қызметкерлері, депутаттар, кәсіпкерлер және көптеген кәсіпорындар мен мекемелер ұжымдары шықты. Өздеріне бекітілген аумақтарды, аулаларын тазалады.
Өңір басшысы Асхат Шахаров пен қала әкімі Азамат Бекет сенбілікке белсене қатысып жатқан ақтөбеліктерге алғыстарын жеткізді. Саябақтардың аумақтарын тазалап жүрген мемлекеттік қызметкерлерге ақсақалдар риза болып, екіайлық сенбілік жұмысына сәттілік тіледі.
«Бізге өздеріңіздей ағалардың ақыл-кеңесі, қолдауы қажет. Жастарды өз ауласын, жалпы қаламызды таза ұстауға шақырып, ақыл айтып жүріңіздер. Тазалық тәртіптен басталады ғой. Құлақ аспайтын жастарға батырып айтсаңыздар да сіздерге жарасады. Сенбілікте ғана емес, жалпы күнделікті тазалыққа мән берілуі керек», – деді облыс әкімі.
