Кітап жәрмеңкесі

Мектеп

Ақтөбедегі №65 орта мектепте ата-аналарға арналған «Кітап жәрмеңкесі» тақырыбында ашық іс-шара өтті.

Кітап жәрмеңкесі мектептің кітапханашысы М.Жұмабаеваның ұйымдастыруымен өткізілді. Оған №12 кітапхананың қызметкері Ж.Садыққызы арнайы шақырылды. Кітапханашылар тарапынан ата-аналарға әдеби көркем шығарманы таңдау ұсынылды. Таңдалатын кітаптардың сырты қалың қағазбен оралғандықтан, ата-аналарға оның нақты қандай шығарма екені белгісіз еді. Кітапханашы М.Жұмабаева оқырмандар таңдаған кітаптан үзінділер мен деректер оқып, сол арқылы ата-аналар әдеби кітаптың атын тауып, авторын айтуға тиіс болды. Іс-шараның бұл бөлімі өте қызықты өтті.

Одан соң «Ертегі терапиясы» өткізілді. Ата-аналар шашылған қиындылардан ертегілер құрастырды.

Үшінші бөлімде Ж.Садыққызы «Кітап — ақыл-ойдың айдыны» атты сұрақ-жауап ойынын ұйымдастырды. Оқырмандар тарихи шығармаларды, әдебиет әлеміндегі тұлғаларды (ақын-жазушылар, кейіпкерлер) атады, қазақтың батырларын еске түсірді.

Ата-аналарға іс-шара қатты ұнап, ұйымдастырушыларға алғыс айтып, осындайтәрбиелік, танымдық мәні зор шараларды жиі өткізуді ұсынды.

 Н.ЖАЙТУҒАНОВА,

№65 орта мектептің бастауыш сынып мұғалімі.