Темірдің таңдаулылары

Марапат

Темір ауданында дәстүрлі «Темір таңдауы»салтанатты іс-шарасы өтті. Кеште жыл бойы ерекше көзге түскен белсенділер марапатталды.

Аудан әкімі Алмас Жақсылықов қоғамдық кеңес шешімімен сала бойынша үздіктер таңдалып, арнайы марапатқа ұсынылғанын, мұндағы мақсат — оларды өзгелерге үлгі ету екенін айтты.

— Жылдағы дәстүр бойынша  ауданның  дамуына сүбелі үлес қосқан әр сала үздіктеріне  лайықты  құрмет көрсету  — біз үшін үлкен мәртебе. Өткен жылда жүрекке жылу  сыйлаған сәттерге ой жүгіртсек, Темірдің перзенті Дәулет  Төлеуғалиев Венгрияның Егер қаласында өткен әлем чемпионатында 80 келі салмақта I орынды иемденсе, V дүниежүзілік көшпенділер ойындарында қазақ күресінен жерлесіміз Назерке Азаматова алтыннан алқа тақты, Президентіміз Қасым-Жомарт Тоқаевтың Жарлығымен «Ерен еңбегі үшін» медалімен марапатталды.

2024 жыл баршамыз үшін қызығы мен қиындығы қатар келген маңызды оқиғаларға толы болды.  Осы орайда жылды қорытындылау мақсатында ұйымдастырылған «Темір таңдауы» байқауында 7 номинация бойынша үміткерлердің өтінімдері қаралды. Үміткерлердің арасынан көп дауыс жинағандар жеңіске жетті, — деді ол.

Атап айтсақ, байқаудың қорытындысы бойынша аудандық орталық аурухананың бас дәрігеріСержан  Жанахметов «Үздік басшы», Кеңқияқ кенттік полиция бөлімшесінің учаскелік полиция инспекторы Ерген  Дуимбаев «Жыл учаскелік полицейі», «Ұлттық боя-бокс» авторлық  жобасының иегері Жамал Бақтығұлова мен мәдениет саласының қызметкері Асылгүл Ермұхамедова «Жыл жаңалығы — 2024», «Азамат» шаруа қожалығы «Жыл шаруа қожалығы», «Санжар» аяқкиім шеберханасының иесі Айнагүл Қансұлтанова «Еңбек адамы», «100 дос» қоғамдық қоры «Жыл жанашыры» аталымдары бойынша марапатталды. Ал жеке кәсіпкер Базаралы Қалданов пен мәдениет саласының ардагері Ардақ Құбаш «Жыл адамы» атанды.

Соңында аудан өнерпаздары мерекелік бағдарламасын ұсынып, көрерменге көтеріңкі көңіл күй сыйлады.

Айәли АЙБЕК.

Темір ауданы.