Тұмаудан сақтан!

 Өңірлік коммуникациялар қызметінде инфекциялық ауруларға қатысты облыстағы  эпидемиологиялық ахуал бойынша брифинг өтті.

Облыстық санитариялық-эпидемиологиялық бақылау департаменті басшысының орынбасары Мұхтар Сербаев тұмау, пневмония, жұқпалы вирусты инфекция бойынша 46 034 жағдай анықталғанын айтты. Науқастардың 31 462-сі 14 жасқа дейінгі балалар болып отыр. Аурушаңдық көрсеткіші  өткен жылдың осы кезеңімен салыстырғанда 1,3  есеге өскен.

Тұмау вирусын анықтау мақсатында полимеразды тізбекті реакция әдісімен 1 118 сынама алынған. Барлығы теріс нәтижені көрсеткен.

— Соңғы аптада жіті респираторлық вирустық инфекция жұқтыру бойынша 8182 жағдай тіркелді. Өткен аптамен салыстырғанда аурушаңдық 1,1 есеге өскендігі байқалды. Сондықтан күн салқында жұқпалы аурулардан барынша сақтанып жүрген жөн, — деді Мұхтар Сербаев.

Сондай-ақ жергілікті бюджеттен тұмауға қарсы 109 400 доза вакцина сатып алынған. 103 556 адам екпе алған. Қазіргі уақытта  жұмыс берушілер есебінен және ақылы түрде екпе жұмыстары жүргізіліп жатыр.

Кәмшат ҚОПАЕВА.