Ұлт ұстазы

Демалыс уақытында «Ахмет. Ұлт ұстазы» телехикаясын қарадым.

Кино 2021 жылы түсірілген, 6 сериалы тарихи-драмалық телехикаядан тұрады. Фильмде Ахмет Байтұрсынұлының өмірі жайлы баяндалады.
Ұлт ұстазының 150 жылдық мерейтойы қарсаңында «Қазақстан»
ұлттық арнасы түсірген екен.

Телехикаяның негізгі идеясы ретінде Ахмет Байтұрсынұлының «Бай болу үшін кәсіп қылу керек, білімді болу
үшін оқу керек, күшті болу үшін бірлік керек һәм осы керектердің жолында әрекет қылу керек» деген әйгілі сөзі басшылыққа алынған.
Мұнда Ахмет Байтұрсынұлының басынан кешкен қиын-қыстау тағдыры баяндала отырып, ұлт мұраты жолында жасаған дамылсыз әрекеті насихатталады. Мұнда мен адал достықты, нағыз еңбекқор ақынды, қиындыққа мойымаған, көп кітап жазған Ахмет Байтұрсыновты таныдым.

Біз әдебиет сабағынан өткен «Адамдық диқаншысы», «Егіннің бастары» өлеңдері халық үшін, болашақ үшін қалдырылған мұра екенін түсіндім.
Телехикаяны көру барысында Қазақ елі үшін аянбай қызмет еткен Ә.Бөкейханов, М.Дулатов секілді тұлғалардың еңбегіне тәнті болдым.
Оқулықтардың алғашқы нұсқалары М.Дулатов «Есеп құрал», А.Байтұрсынов «Әдебиет танытқыш» деген атаулармен жарық көргені мен үшін жаңалық болды.
Қорыта келе айтқанда, отандық кино әлемі қарыштап дамуда.
Осындай әдеби құндылықтарымызды көрсететін фильмдерді көруге
шақырамын.

Ақерке ЗЕЙНОЛЛА,
М.Құсайынов атындағы облыстық дарынды балаларға
арналған мамандандырылған мектеп-интернаттың
8-сынып оқушысы.