Алтындының жаңа мектебі
Мұғалжар ауданы Қайыңды ауылдық округіне қарасты Алтынды ауылында 60 орындық жаңа мектеп ашылды.
Мектептің ашылу салтанатына облыс әкімінің орынбасары Жолдас Батырхан, Мұғалжар ауданының әкімі Дархан Ермағанбетов және ауыл тұрғындары қатысты.
— Ұлттық мереке— Республика күні мерекесі қарсаңында Алтынды ауылында жаңа мектеп пайдалануға беріліп отыр. Бұл— ауыл тұрғындары мен ата-аналар және оқушылар үшін үлкен қуаныш. Осы білім ордасынан білімді оқушылар шығады деген сенімдемін, — деді облыс әкімінің орынбасары Жолдас Батырхан.
Алтынды жалпы білім беретін орта мектебінде 23 мұғалім қызмет атқарып, 128 оқушы білім алады.
Жаңа білім ошағы заманауи талаптарға сай, 60 орындық. Мектепте химия, биология, физика, көркем еңбек пәндеріне арналған 10 кабинет пен заманауи құрал-жабдықтармен қамтылған зертханалар оқушылардың сапалы білім алуына мүмкіндік береді. Сондай-ақ кең, жайлы спорт залы мен асханасы бар. Мектеп ауласында спорттық ойындарға арналған екі алаң салынған, бұл оқушылардың дамуына және белсенді өмір салтын ұстануына ықпал етеді.
Еске сала кетейік, мектептің құрылыс жұмыстарын «Техно-С ЖШС жүргізді.
А.ІЛИЯСҚЫЗЫ.
