Өнерлі өрге жүзер
Байқау
Сағи Жиенбаев атындағы жасөспірімдер кітапханасында өткен «Өнерлі өрге жүзер» республикалық байқауының облыстық кезеңіне шығармашыл, дарынды жастар қатысты. «Мың бала» жобасы шеңберінде ұйымдастырылған байқауға 8 ауданнан келген оннан астам оқушы өнер көрсетті.
— Елімізде Мемлекет басшысының бастамасымен отбасы құндылықтарын насихаттауда көптеген жобалар қолға алынып жатқаны белгілі. «Мың бала» жобасының жастарды патриоттыққа, адамгершілік қасиеттерге тәрбиелеуде, отбасы құндылықтарын сақтауға баулуда маңызы зор. Бұл жолғы іс-шараның мақсаты — мемлекеттік тілдің мәртебесін көтеріп, қолданыс аясын кеңейту, — дейді «Қоғамдық келісім» коммуналдық мемлекеттік мекемесінің бөлім басшысы Марғұлан Нұрмағанбетов.
Іс-шара барысында түрлі ұлт өкілдері өз өнерін ортаға салып, өзара бақ сынасты. Солардың бірі — Мәншүк Мәметова атындағы Ақтөбе жоғары медициналық колледжінің білім алушысы Қанат Хитрук.
— Бұл — менің облыстық деңгейде ұйымдастырылған байқауға алғаш қатысуым. Ұлтым — украин. Отбасымызда қазақтың салт-дәстүрлерін берік ұстанамыз. Ауқымды іс-шарадан мол тәжірибе жинақтап, жаңа достар таптым. Осындай облыстық байқауда кәсіби өнер адамдарының алдында өнер көрсетудің өзі мен үшін жетістік. Маған күш-жігер беріп, қолдаған ата-анама, оқытушыларыма алғысым шексіз, — дейді қатысушы.
Байқаудың бас жүлдесі Нелли Югайға бұйырды. Ол қараша айында өтетін республикалық кезеңде облыс намысын қорғайды. Қатысушыларға ұйымдастыру алқасының дипломдары және естелік сыйлықтары табысталды.
Ақмарал МҰҚАШЕВА.