Шәмші рухына тағзым

Ән кеші

Қарғалы ауданы Шәмші ауылында Қазақстанның халық әртісі Шәмші Қалдаяқовтың туған күніне орай еске алу іс-шарасы өтті.

Әуелі «Шәмші» қорының төрағасы Бақыт Ғизатов бастаған ел азаматтары ақын ескерткішіне гүл шоқтарын қойып, ұлы сазгердің рухына тағзым етті.

— Арыстың жағасынан түлеп ұшқан Шәмші бүкіл қазақ даласын әнмен әлдиледі. Шәмші Қалдаяқовтың ән мұрасы бүгінде ұлтымыздың мәңгі өшпес рухани құндылығына айналды. Оның рухына тағзым ету — біздің перзенттік парызымыз, — дейді «Шәмші» қорының төрағасы,  ардагері Бақыт Ғизатов.

Іс-шара барысында  Шәмшінің мерейін асқақтату жолында талай іске бастамашы болған Қайырғали Арыстанғалиев сөз сөйлеп, «Қазақ вальсінің королі» атанған сазгер туралы естеліктерімен бөлісті.

Тағылымды іс-шара Петропавл, Шәмші ауылдық Мәдениет үйі өнерпаздарының концерттік бағдарламасымен жалғасты. Кеш барысында сазгердің «Ана туралы жыр», «Сыған серенадасы» сияқты ел жадынан өшпестей орын алған әндері шырқалды.

Бақыт ИМАШЕВ,

Қарғалы ауданы.