Диастың жетістігі
Облыс әкімінің орынбасары Ғалымжан Елеуов дарынды жасөспірімдерге арналған облыстық мамандандырылған «Білім-инновация» лицей-интернатының оқушысы, халықаралық олимпиаданың қола жүлдегері Диас Сүлейменовті марапаттады.
Диас Сүлейменов пен оның ата-анасы облыс әкімдігіне шақырылды. Ғалымжан Елеуов әлемдік деңгейдегі жоғары көрсеткіші үшін Диасқа облыс әкімінің атынан Алғыс хат пен ақшалай сертификат табыстады. Диастың ата-анасы да баласына жақсы тәрбие беріп, үлгі болып, көрсеткен қолдауы мен лайықты білім бергеніүшін Алғыс хатпен марапатталды.
Айта кетсек, биыл 6-14 шілде аралығында Астанада IBO-2024 биология пәні бойынша ХХХV халықаралық олимпиада өтті. Білім додасына 81 елден 305 оқушы қатысты. Олимпиада барысында бір апта бойы қатысушылар биохимия, молекулярлық биология, биоинформатика және жан-жануарлардың анатомиясы мен физиологиясы бойынша екі теориялық, төрт практикалық турда сынға түсті. Барлық тапсырманы Қазақстанның жас биологтары әзірледі.
Білім додасының қорытындысы бойынша 173 марапат берілді, оның ішінде 87 қола, 56 күміс және 30 алтын медаль. Қазақстан құрама командасы IBO-2024 олимпиадасында 100 пайыз медаль көрсеткішіне қол жеткізіп, төрт қола медальді қанжығалады. Олардың біріҚазақстан құрамасының мүшесі Диас Сүлейменов халықаралық дәрежеде қола медаль иегері атанды. Сондай-ақ ол — жалпы білім беретін пәндер бойынша республикалық олимпиадалардың бірнеше дүркін жүлдегері. Олимпиаданың жабылу рәсіміне Оқу-ағарту министрі Ғани Бейсембаев, елшіліктер мен жоғары оқу орындарының, ғылыми институттардың өкілдері, IBO халықаралық комитетінің төрағасы Ленка Либусова қатысқан болатын.
Арайлым НҰРБАЕВА.
