«Тұран» тобы — «Ұшқыр ой» білімпазы
Жастар саясаты
С.Жиенбаев атындағы Ақтөбе облыстық жасөспірімдер кітапханасының креативті орталығында студенттер арасында «Ұшқыр ой» зияткерлік ойыны өтті.
«Қоғамдық даму орталығы» мекемесіұйымдастырған іс-шараның мақсаты — танымдық қабілет пен ақыл-ойдықалыптастыру, ұлттық, тарихи, мәдени, рухани құндылықтарды жастардың арасында дәріптеу.
«Рухани жаңғыру» қағидаларына негізделген тәрбие жұмысын жетілдіруге арналған шараға Қ.Жұбанов атындағы Ақтөбе өңірлік университетінің студенттерінен жасақталған бірнеше топқатысты.
— Зияткерлік ойын өлкетану, дәстүр мен ғұрып, Қазақстан тарихы, мақал-мәтел, шешендік сөздер секілді 5 кезеңнен тұрды. Әр кезеңде түрлі тақырыптағы көптеген қызықты сұрақтар болды. Шапшаң ойлап, ұтымды жауап беруге тырыстық. Осындай ойлау қабілетімізді арттыратын, таным көкжиегімізді кеңейтетін зияткерлік ойындардың жиі болып тұрғаны жақсы, — дейді ойынға қатысушы Нұрислам Тоқмырзаев.
Шара барысында қатысушыларды сергіту мақсатында әуенді үзілістер мен кофе-брейк ұйымдастырылды.
Төрешілер зеректіктерімен ерекшеленген «Тұран» тобын жеңімпаз деп таныды. Екінші орынға — «Eco Aqyl» тобы, үшінші орынға «Заман біздікі» тобы ие болды.Жүлдегерлер Қоғамдық даму орталығының басшысы Жәнібек Досовтың Алғыс хатымен марапатталып,барлық қатысушыларға сертификаттар мен гүл шоқтары табысталды.
Айнұр ІЛИЯСҚЫЗЫ.