Қызылшамен ауыратындар азаймай тұр
Қызылшаға қатысты эпидемиологиялық жағдай алаңдатып тұр. Аталған ауру, әсіресе балалар арасында белең алған.
Облыстық денсаулық сақтау басқармасының бас педиатры Нұргүл Сарманованың айтуынша, 2 қарашадағы жағдай бойынша өңірде 182 адам (149-ы қалада, қалғандары — аудандарда) қызылшаға қарсы стационарлық ем қабылдап жатыр, соның 136-сы — бала. «Аурудың 78 пайызы қызылшаға қарсы егілмеген балалар арасында тіркеліп отыр», — дейді ол.
Облыстық санитарлық-эпидемиологиялық бақылау департаменті басшысының орынбасары МұхтарСербаев Ақтөбеде қызылшамен ауыратын науқастарға барлығы 272 жатын орын, атап айтқанда, «Шағала» шипажайында — 160, аудандық ауруханаларда 101 кереует дайындалғанын атап өтті.
— Ұлттық күнтізбеге сәйкес, қызылшаға қарсы екпе екі рет беріледі, 1 және 6 жаста. Бас мемлекеттік санитарлық дәрігердің қаулысына сай елімізде 6 айдан 11 айға дейінгі, 2 жастан 5 жасқа дейінгі балаларды қосымша иммундау жұмыстары жүргізілетін болады.
Облыста 6-11 ай аралығындағы сәбилерге екпе салу 6 қарашада, ал 2-5 жас аралығындағы балдырғандарға екпе салу 5 желтоқсанда басталады, — деді М.Сербаев.
Өңірлік коммуникациялар қызметінде өткен брифингте облыстық денсаулық сақтау басқармасының штаттан тыс бас иммунологіЛейля Нұржанова қазан айында медициналық мекемелерге екпенің 8832 мөлшері таратылғанын, қорда әлі 17 мың екпе барын баян етті. Сондай-ақ қызылшаға қарсы қосымша иммундау үшін 72400 екпе сатып алынбақ.
Айта кетейік, ақтөбеліктер қызылшаға қарсы екпені мекенжай бойынша тіркелген емханаға барып, тегін ала алады.
Айбек СЕРІКҰЛЫ.
