Су сапасы мен қолжетімділігі — басты назарда!
Ақылжан ТЕЛЕУОВ,
Қ.Жұбанов атындағы Ақтөбе өңірлік университетінің экология және биология кафедрасының доценті
— Мемлекет басшысы Қасым-Жомарт Тоқаев Қазақстан халқына Жолдауында бүгінгі және ұзақ мерзімді перспективада республика алдында тұрған аса өзекті мәселелер мен міндеттерді қозғады. Осындай проблемалардың бірі — су ресурстарының қолжетімділігі мен сапасы. Бұл ретте Президент ішкі су ресурстарын үнемдеп пайдаланудың маңыздылығын әрі еріген су резервін дұрыс пайдалану мүмкіндігіне айрықша мән беру қажеттігіне тоқталды.
Біздің облыста барлық дерлік су ресурстары (жерүсті, жерасты) еріген суға немесе қысқы жауын-шашынға байланысты. Әрине, жауын-шашынның көп бөлігі біркелкі емес, бірақ бұл — Президент айтқандай, аймақтағы су объектілері үшін жалғыз ішкі резерв.
Мұғалжар тауларының еріген сулары біздің барлық өзендеріміздің— Елек, Қауылжыр (Шалқар көлі), Ойыл, Сағыз, Ырғыз, Ор, Ембі, Темір бастауы және олардың салаларын тудырады. Бұл өзендер халықты ауызсумен қамтамасыз ететін көптеген жерасты резервуарларын қоректендіреді, соның ішінде экологтар жылдар бойы айтып келе жатқан бірегей Көкжиде кен орнын сақтауды қалыптастырады.
Жолдауда су ресурстарының ел үшін маңызы зор екендігі атап көрсетілген. Осы саладағы барлық бұзушылық қатаң түрде тоқтатылады, ал кінәлілер заңның барлық қатаңдығымен жазаланады. Осыған байланысты дербес ведомство — Су ресурстары және ирригация министрлігін құру — оның шеңберінде Ұлттық гидрогеологиялық қызмет қайта құрылатын болады. Бұл экологиялық ұйымдар мен облыс халқыныңжыл сайын көтеретін су ресурстарын сақтау және ұтымды пайдалану мәселелерін шешуге мүмкіндік береді.
