Ақтөбеде Астана күнінде 19 сәби дүниеге келді

Елорда күні өңірдің перинаталдық орталықтарында 19 сәби дүниеге келді, оның ішінде 11-і – қыз және 8-і – ұл.

Облыс әкімі Ералы Тоғжанов облыстық перинаталдық орталыққа барып, аналарды өміріндегі ең бақытты сәт – балаларын дүниеге әкелуімен құттықтады. Мұнда бүгін 5 қыз және бір ұл туған.

Медина –  Қаракөз Ешниязованың көптен күткен қуанышы, тұңғышы. Жанерке Серік пен Аида Хайруллина көпбалалы отбасы атанды.

💬 «Бүгін сіз және сіздің отбасыларыңыз үшін қос мереке. Сіздерге және жаңа туған нәрестелерге зор денсаулық, бақыт, амандық тілеймін. Балалар еліміздің мақтанышына айналсын», – деп ақжарма тілегін білдірген өңір басшысы аналарға сыйлықтар табыстады.

Айта кетейік, Астана күнін мерекелеу аясында өңірде 100-ден астам мерекелік шара ұйымдастырылады. Ақтөбедегі алаңдар мен саябақтарда дәстүрлі мерекелік бағдарламалардан бөлек, облыс тұрғындары мен қонақтары көрмелерге, жәрмеңкелерге, концерттік бағдарламаларға қатыса алады.

Д.АЙДАР.