Әлемді қайырымдылық құтқарады
1 НАУРЫЗ – АЛҒЫС АЙТУ КҮНІ
Нұрлан ҮДЕРБАЙ,
«Қызыл Ай қоғамы» қоғамдық бірлестігі облыстық филиалының директоры:
— Ондаған жыл бойы түрлі қиын жағдайға ұшыраған жандарға күн сайын дерлік көмек ұйымдастырып келеміз. Мысалы, жақында ғана тұрақты мекенжайы жоқ, түрлі себеппен үйсіз жүрген жандар үшін қайырымдылық іс-шарасын ұйымдастырып, 25 адамға түскі ас бердік. Қыстың көзі қырауда олар үшін бұл үлкен көмек екенін айтысып, ризашылықтарын білдірді. Жалпы, түрлі себеппен қиындыққа ұшыраған жандарға қол ұшын созғандағы мақсатымыз — тек материалдық тұрғыдан көмектесу ғана емес, оларға моральдық-психологиялық қолдау көрсету еді.
Әрине, қайырымдылық іс-шаралардың бәрі қайырымды жандардың, демеушілердің, ақшалай жәрдем бере алмағанмен, уақытын бөліп, сол іс-шаралардың басынан соңына дейін қызмет етіп жүретін еріктілердің қолдауымен ұйымдастырылады. Әлемді қайырымдылық құтқарады. Көктемнің шуақты мерекесі — Алғыс айту күнінде тіпті жақыны, туысы болмаса да, тағдырдың тауқыметіне ұшырап, қиындық көрген жандарға қол ұшын созуға әрдайым әзір мейірімді жандарға өзімнің ризашылығымды жеткізіп, мың алғыс айтқым келеді.