30 бағана орнатылады

Темір ауданында тозығы жеткен, құлағалы тұрған электр бағаналары көп. Бұл адам өміріне, сондағы ғимараттарға қауіп төндіретіні белгілі. Биыл осы олқылықты түзету жайы қолға алынды.

Тұрғындар бұған дейін аталған мәселеге қатысты талай рет шағымданған еді. 2017 жылы қойылған бағаналар қисайып, құлаудың сәл-ақ алдында тұрған. Жергілікті атқарушы билік биыл солардың 30-ын жаңартуға кірісті.

— Алғашқы кезекте ауыстырылуы тиіс 30 бағана анықталды. Қоғамдық қабылдауларда да осы мәселе айтылған. Мердігер — «Әлихан Ойл 3» жауапкершілігі шектеулі серіктестігі, — дейді аудан әкімінің орынбасары Жандәурен Қойшыбаев.

Темірбетоннан жасалған бағаналарды жаңарту жұмыстары ауданда басталып кетті.

Алау АЙБЕК,
Темір ауданы.