Ұлағатты ұстазға арналды
Оқу бұрышы
«Оқуға құштар мектеп, оқуға құштар ұлт» жобасы аясында М.Құсайынов атындағы дарынды балаларға арналған мамандандырылған мектеп-интернатында оқу бұрышы ашылды. Шара аталған білім шаңырағының директоры қызметін атқарған Мақсот Құсайыновтың туғанына 85 жылдығына орай өткізілді.
Жиынға облыстық білім басқармасының басшысы Жолдас Батырхан, М.Құсайыновтың зайыбы мен ұрпақтары, мектеп-интернат түлектері, оқушылар қатысты.
Шараның мақсаты — оқушылардың көркем әдебиетке қызығушылығын арттыру. Сондай-ақ педагогика саласына үлкен үлес қосқан Мақсот Құсайыновтың еңбек жолын насихаттау.
Облыстың бас педагогі Мемлекет басшысы Қасым-Жомарт Тоқаевтың тапсырмасы аясында қолға алған «Оқуға құштар мектеп» жобасының маңыздылығын айтты. Жолдас Батырхан балаларға жан-жақты білім мен тәрбие беру мақсатындағы келелі іске ұйытқы болған мектеп түлектері мен ұстаздарға шығармашылық табыс тілеп, мектеп кітапханасына кітаптар сыйлады.
— «Оқуға құштар мектеп» бұрышында ұйымдастырылған «Ашық кітапханада» оқу бағдарламасында бар барлық көркем әдебиеттер, сондай-ақ басқа жанрлардағы кітаптар да жүктелді. Соның арқасында кез келген уақытта, кез келген жерде сүйікті кітабыңызды оқи аласыз, — деді мектеп директоры Нұрбек Аманов.
Мектеп-интернаттың өзін-өзі басқару ұйымының президенті, «Елбасы медалінің» қола медаль иегері, республикалық «Абай оқулары» байқауының жүлдегері Бауыржан Жақсылықов «Ашық кітапхана» жұмысымен таныстырды. Сондай-ақ ол «Кітап — серігім» арнауын оқыды. Облыстық және республикалық пәндік олимпиада, ғылыми жобалар мен шығармашылық сайыстардың жеңімпаздары Жансұлу Әбидолла ағылшын тілінде, Әйгерім Қалжігітова орыс тілінде оқыған кітаптары туралы ойларымен бөлісті.
Жиында мектеп-интернаттың 1989 жылғы түлегі, грек-рим күресінен ҚР еңбек сіңірген жаттықтырушысы, Азиялық күрес кеңесі президентінің кеңесшісі Қайыржан Бекенбаев сөз сөйлеп, ізгі тілегін білдірді.
Айта кету керек, «Қазақ ССР-інің еңбек сіңірген халыққа білім беру қызметкері» иегері Мақсот Құсайынов шалғайдағы малшылар мен ауыл еңбеккерлерінің балаларына арналған мектеп-интернатты «Ақтөбе облыстық дарынды балалар мектеп-интернаты» статусына өзгертуге үлес қосты. Ол — үздіксіз ізденістер мен жаңашыл бастамалардың нәтижесінде 1991 жылы республикада алғаш болып «Дарынды балаларды саралап оқытудың тұжырымдамасын» қорғап, тәжірибеге енгізді. Бүгінде Мақсот Құсайыновтың шәкірттері еліміздің түкпір-түкпірінде ел игілігі үшн қызмет етіп жүр.
Гүлжан БАЗЫЛҚЫЗЫ.
