Еліміз абырой биігінен көрінген сәт
Әлемдік қауіпсіздікті сақтайық, ол үшін мынадай-мынадай іс-шаралар қабылдайық деп Қазақстанның қолдан келгеннің бәрін де жасағанын, ал еліміздің нақты ұсыныстарын таразыға тартқандар солардың қажеттігін тегіс мойындағанын, бірақ құжат жүзінде қабылдарға келгенде бүгінгі күннің кикілжіңдері, қырғи-қабақтығы өрелі іске өріс бермей аяққа тұсау, қолға кісен болғанын мамандар, зерттеушілер, сарапшылар – бәрі де нақпа-нақ көлденең тартып отыр.
Енді екі күн бойы өзіміз көзбе-көз көріп, куә болған осынау тарихи оқиғаның кейбір жайттары хақында әңгімелейік.
Бір қызығы сол, кешегі КСРО-ның құрамында болған бүгінгі кейбір тәуелсіз елдер басшылары жақсы біліп тұрса да орыс тілінде сөйлемей, ағылшын немесе өз тілдерінде сөйледі. Мысалы, Украина президенті В.Янукович украинша, Әзірбайжан, Грузия президенттері И.Алиев пен М.Саакашвили ағылшын тілінде сөйледі. Әрине, украин тілі ЕҚЫҰ-ның бес жұмысшы тілінің қатарына енбейді, бірақ В.Януковичтің адамдары оның сөзін бес тілге аударып әкелгенге ұқсайды, өйткені аударма ілеспелі түрде беріліп жатты.
Журналистерге арналған жүрек жалғарлық дәмдер мен шай, кофелер фойелерде қай кезде барсаң да дайын тұрды. Қызмет көрсетіп жүрген қыздар мен жігіттер де барынша биязы, үнемі күлімдеп құрмет пен сыйластық танытты. Бірдеңе сұрасаң, барынша сыпайы жауап береді. Соған қарап, үйретсе бізде де сервистік қызметті жоғары деңгейде көрсете алады екен-ау деп қалдық.
Ал енді түстік және кешкілік ыстық дәмдер шын мәнінде қазақтың дарқандығын көрсеткен еді. Орысша білетін бір неміс журналисінен дәміміз қалай екен деп сұраған едім, “бесподобно” деді ол. Шынында да, қазақтың дастарқаны журналистерге ұмытылмастай әсер қалдырды. Берілген тағамдарды тізбелеп шығу да көп орынды алған болар еді, сондықтан ол ойымыздан шұғыл бас тартуға тура келіп тұр.
Бірінші күнгі отырыста көптеген сөйлеушілер “бес минөттік” шектен шығып, ұзағырақ сөйлегендіктен, бұл күнге белгіленген он шақты адамға сөз тимей қалды. Мәжіліс уақытында аяқталып, сол күні мәртебелі меймандар концерт тамашалады. Ал журналистер “Хан Шатырға” апарылып, қонақ етілді. Мұнда да концерт көрсетіліп, сонымен қатар, “швед үстелі” арқылы берілген дәмнің неше түріне, тіпті жеңіл ішімдіктерге де шек қойылған жоқ. Бәрі де қазақша айтқанда, ағыл-тегіл болды. Бірақ тәртіптілік пен ұстамдылықтың шегінен шығу орын алған жоқ.
Барлық “қызық” екінші күні болды. Қолымызға берілген бағдарлама бойынша күндізгі 12.30-да бәрі аяқталып, Президент Нұрсұлтан Назарбаевтың қорытынды баспасөз мәслихаты өтуі тиіс-ті. Бірақ 12.30-да әлі көп адам сөйлеп бола қойған жоқ еді, сондықтан аяқталу уақыты 15.00-ге баратын шығар деп топшылағанбыз. Айтқандай, сол уақытта баспасөз мәслихаты өтетін залға шақырған хабар естілді. Алдыңғы жақтан орын алмаққа тырысып, жұрттан бұрын жетіп тұрмыз. Жарты сағат… бір сағаттай тұрдық… Еш ақпарат жоқ. Тек әлден уақытта ғана “пресс-конференция 17.00-ге ауыстырылды” деген хабар жетті.
Беске жақындағанда да келіп, үйме-жүйме болып тұрмыз. Бұл уақытта да жарты сағаттан артық тостық. Бұл жолы 19.00-ге ауыстырылды деп таратты. Жетіде келіп едік, 20.00-ге шегерілді делінді.
Жүрек күпті… Шынымен құжат қабылданбай қалмай ма, олай болса, саммит еш нәтижесіз аяқталады деген сөз ғой…
Журналистерге саммитті көрсетіп жатқан мониторлар сағат 15.00 шамасында өшірілген. Сондықтан, ешқандай хабар біле алмай, дағдарудамыз. Кейбір ұйымдастырушылар мен ЕҚЫҰ қызметкерлерінің телефонмен сөйлескеніне елеңдесіп қаламыз. Өзіміз көріп жүретін Ұйымның баспасөз қызметінде істейтін бір әйелдің орысшалап: “Проваливается”, дегенін құлақ шалып қалды. Не дейді, шынымен солай болғаны ма? Жоқ, мүмкін емес, Елбасы бұдан да күрделі жағдайлардан жол тауып шыға білген сұңғыла саясаткер ғой, дейміз іштей… Сөйтеміз де, Алладан жәрдем тілейміз.
Кешкі 20.00-де болады деген баспасөз мәслихаты “белгісіз уақытқа” шегерілді. Біз түгілі бүкіл еліміздің есті-басты адамдары бұл мезгілде қатты күдікке шырмалған еді. Басылымымыздың басшылары кезек хабарласып, не болып жатқанын жиі сұрауда.
Сағат 21.00… 22.00… 23.00 болды… Тым-тырыс… Радио арқылы журналистерді апаратын автобустар дайын екені бірнеше рет айтылды. Тіпті, түнгі Астанаға серуен жасалады деп те қызықтырып жатыр. Бірақ саммиттің нәтижесі қызықтырған журналистер тарайтын емес.
Сағат он бірден өте редакциядан бәрің бірдей отырмай, баспасөз мәслихатын жазатындар ғана қалып, қалғандарың жүре беріңдер, мәшине жіберейік деген хабар жетті. Әрине, ол таңғы сағат бестен тұрып, аяғынан сарсылып жүрген қызметкерлерді аяғандықтың белгісі еді. Біз болсақ сегіз адамбыз, соның бесеуі кетіп, мәслихатты жазатын үш адам қалсақ болар деген ойымды әріптестеріме айтқан едім, олар: “Ешқайда кетпейміз, көбіне шыдағанда, енді азына шыдайық. Елбасына да оңай болып жатқан жоқ, барлық тілегімізбен, ниетімізбен қолдау білдіріп, осы жерден тапжылмайық”, деді. Сөйтіп, егемендік сегіз адам Елбасының қасынан табылдық деп мақтануымызға болады.
Түнгі сағат 12-ден өткенде ғана декларация қабылданды деген хабар келді. Бәріміз де қуанғаннан “уралап” жібердік. Редакцияға шұғыл хабарласып, “сүйінші” хабарды жеткіздік. Одан кейін Елбасы Нұрсұлтан Назарбаев келіп, баспасөз мәслихатын өткізді. Атап көрсететін бір жәйт – тосып жүрген біз қатты шаршағанда, ол кісі тып-тың, барлық сөзін нық-нық айтып, сергек те көңілді отырды. Оның себебі де, әрине, түсінікті еді. Сөйтіп, жарты сағатқа белгіленген баспасөз мәслихаты бір сағатқа жуық уақытқа созылды.
Сонымен, ЕҚЫҰ Саммиті сәтті аяқталды. Астана Декларациясының қабылдануы еліміз үшін үлкен абырой болды.
Жақсыбай САМРАТ.
«Егемен Қазақстан» газетінен.
***
Астана Декларациясының қабылдануы — еліміз үшін үлкен абырой
Биылғы жылдың 1-2 желтоқсанында Астанада Қазақстан Республикасының Президенті Нұрсұлтан Назарбаевтың төрағалығымен Еуропадағы қауіпсіздік және ынтымақтастық ұйымының Жетінші Саммиті болып өткені белгілі. Саммитте Астана Декларациясының қабылдануы еліміз үшін үлкен абырой болды.
Саммит жұмысына Еуропадағы қауіпсіздік және ынтымақтастық ұйымына мүше және серіктес елдерден, сондай-ақ БҰҰ, ЕО, ТМД, ЕурАзЭС, ШЫҰ, ҰҚШҰ және т.б. ірі халықаралық және аймақтық ұйымдардан — барлығы 73 ресми делегация қатысты. Қатысушылар мен қонақтардың жалпы саны 5 мыңға жуық болды.
Саммит жұмысы жөнінде хабар таратуға жұмылған қазақстандық және шетелдік журналистер саны 1300 болды.
Форумда сөйлеген сөзінде Елбасы Нұрсұлтан Назарбаев 11 жылдық үзілістен кейін ұйымдастырылған Астана форумының тарихи маңызы туралы: «Саммит қауіпсіздік пен ынтымақтастық деңгейін жаңа белестерге көтереді» — деп атап өткен еді.
Беделді Ұйымның Орталық Азияда өткен алғашқы Саммитінде аймақ үшін аса маңызды мәселелерді — лаңкестік, адам саудасы сынды трансұлттық қатерлер, Қырғызстанда жуырда орын алған оқиғалар және Ауғанстандағы жағдайды — кең түрде талқылауға мүмкіндік туды.
Саммиттің басты жетістігі ұзаққа созылған, тартысты консультациялар қорытындысында Астана Декларациясының қабылдануы болды. Құжатта қатысушы елдер Ұйымның әскери-саяси салада ашықтыққа, сенімге негізделген; ал экономика және экология салаларында салиқалы саясатқа басымдық беретін; сондай-ақ адам құқығын, негізгі бостандықтар мен заң үстемдігін толық сақтауға қатысты үдерістерін қуаттады.
Жалпы, БАҚ-тар мен сарапшылар Саммит қорытындылары мен Астана Декларациясының мазмұнын сараптау арқылы көптеген жетістіктерді атап көрсетіп отыр. Сондай пікірлердің бірін атасақ, «Егемен Қазақстан» газетінің 11 желтоқсан күнгі санында Әлисұлтан Құланбай «Саммит қорытындылары мен Астана Декларациясының мазмұнын сараптау мынадай негізгі қорытындылар жасауға негіз береді» — дей келіп, былай атап өтеді:
«1) Қазақстан төрағалығы осы беделді халықаралық ұйымдағы өзінің іс-қимыл бағдарламасын толықтай жүзеге асырды.
2) Соңғы 8 жылдан бері алғаш рет ЕҚЫҰ-ның жалпысаяси қорытынды құжаты қабылдануының өзі келісті оқиға болды. Бұдан былай қарай ұйым аясында Хельсинки, Париж және басқа да негіз қалаушы құжаттар қатарында Астана Декларациясына да тұрақты түрде сілтеме жасалатын болады.
3) Ұйымның Хельсинки Қорытынды актісінен басталатын барлық үш өлшемі бойынша бүкіл міндеттемелер, қалыптар мен қағидаттар қайта қуатталды. Аталған факт «қырғи-қабақ соғыс» кезеңіндегі ескі стереотиптерді шын мәнінде еңсеру мүмкіндігі мен ЕҚЫҰ аясында ХХІ ғасырдағы өзара іс-қимылдың жаңа кезеңі басталғаны туралы айтуға мүмкіндік береді.
4) ЕҚЫҰ-ның қауіпсіздік және жанжалдарды шешу мәселелері бойынша үнқатысуды қамтамасыз ететін керемет ұйым ретіндегі рөлі қуатталды. Жанжалдарды шешу қағидаттарының, сондай-ақ Ауғанстан аумағынан арна тартатын трансұлттық қауіп-қатерлермен күресті күшейтуде күш біріктірудің маңызы зор екені ерекше атап көрсетіледі.
5) Барлық тараптар мен әріптестер мүдделерінің, бірінші кезекте, жанжалды проблематика мен гуманитарлық өлшем бойынша нәзік балансы қамтамасыз етілді.
6) Оның үстіне Саммиттің қорытынды құжаты өзіне айтарлықтай саяси салмақ алады. Өйткені, құжатта алғаш рет «Қауіпсіздіктің еуроатлантикалық және еуразиялық» қоғамдастығы түсінігі (бұған дейін ЕҚЫҰ құжаттарында қауіпсіздік қоғамдастығы) немесе еуроатлантикалық және еуразиялық аймақ деп айтылып келген-тін) бекітіліп отыр. Бұл термин посткеңестік аймақты нысан ретінде емес, қауіпсіздік қоғамдастығын қалыптастыру үдерістеріне толық қатысушы ретінде көрсетеді.
7) Сонымен бірге, ЕҚЫҰ аясында «Қауіпсіздіктің еуроатлантикалық және еуразиялық қоғамдастығы» түсінігін жаһандық деңгейде берік тамырландыру ұзақ мерзімді перспективада Қазақстанның «Мұхиттан Мұхитқа дейінгі» (Атлант мұхитынан Тынық мұхитына және Солтүстік мұзды мұхитынан Үнді мұхитына дейінгі – төрт мұхит шекараларындағы қауіпсіздіктің біртұтас кеңістігі) қауіпсіздік пен ынтымақтастықты кең координаттарда көруге қатысты жаңа деңгейге өту стратегиясын жүзеге асыруға мүмкіндік береді деп есептеуге болады.
8) Нақты іс-қимыл жоспарын қабылдау мүмкін болмағанына қарамастан, құжат жобасы келесі төрағалық үшін негізгі бағыт-бағдарларды айқындайды. Оның үстіне Қазақстан төрағалығы әуел баста-ақ Астана Саммиті «дайын шешімдердің» форумы болмайтынын мәлімдеген болатын. Осыған байланысты Қазақстан, ЕҚЫҰ-ның белсенді қатысушы елі және 2011 жыл бойы «Үштіктің» мүшесі ретінде, Астана Декларациясында қарастырылғанындай, атқарылған жұмыстар негізінде іс-қимыл жоспарының нақты сұлбасын жасауға дәйектілікпен күш-жігер жұмсайтын болады. Бұл Ұйым аясында «Астана мұрасын» бекітуге мүмкіндік береді».
Ал Саммитке қатысушылар Қазақстанның 2010 жылғы белсенді де жемісті төрағалығына жоғары баға беріп, Ұйым жұмысындағы қарқынды ырғақты сақтау қажеттігін атап көрсетті.
Әзірлеген И. ЖАЙМАҒАМБЕТОВА.
Қазақ елі үшін зор мәртебе
ЕҚЫҰ Саммитінің Астанада өткізілуі әрбір қазақтың, Қазақстан азаматтарының зор мақтанышы деп ойлаймын. Өз басым, тарих пәнінің мұғалімі ретінде сабағымның бастамасын осы тақырыптан бастадым. Мен жеріміздің кеңдігін, халқымыздың соған сай дархандығын, Елбасының көрегендігін, данышпандығын сезініп, алыс-жақыннан келіп жатқан мәртебелі қонақтардың алдарында мерейіміздің үстемдігін бастан кешудемін.
Бұл жиын — ең алдымен Елбасымыз Н.Ә.Назарбаевтың тыңғылықты саяси жетістіктерінің жемісі деп ойлаймын. Әлемдегі 56 мемлекеттің басшылары мен өкілдерінің бір мезгілде Қазақстанда бас қосып, күрделі мәселелерді шешуі үлкен тарихи оқиға деп білемін. Осы жиында бүкіл дүниежүзінің халықтарына пайдалы көптеген мәселелер шешімін тапты.
1-2 желтоқсанда тікелей эфирден Астана Саммитінің ресми басталуын Қобда гимназиясының мұғалімдері жоғары сынып оқушылармен бірге көріп, пікір бөлісті.
Осындай басшысы бар елдің ұрпағын оқытып, осы елдің азаматы ретінде өз үлесімді қосып жүргенімді, осы елде туып өскенімді мен бүкіл жаһанға мақтан тұтамын.
Зағипа Арихова,
Қобда гимназиясының тарих пәнінің мұғалімі,
ҚР білім беру ісінің үздігі.
Жаңа ғасырдағы тұңғыш саммит
Қазақстан үшін биылғы барыс жылы жаһандық саясатта жұлдызы жанған жыл болып тұр. Жер бетіндегі Біріккен Ұлттар Ұйымынан кейінгі үлкен құрылым — 56 елдің басын қосқан Еуропадағы қауіпсіздік және ынтымақтастық ұйымының үшінші мыңжылдықтағы, XXI ғасырдағы Саммиті Қазақстанның төрағалығымен Астанада жоғары деңгейде өтті. Қазақстан өзінің салиқалы саясатының арқасында ЕҚЫҰ төрағасы және осы ұйымның Саммитін шақырушы ел ретінде төрткүл дүниенің назарын өзіне аударды.
Бүгінгі күнге дейін Қазақстан адамзат тарихында ядролық қарудан өз еркімен бас тартқан тұңғыш әрі жалғыз ел болып отыр. Мұны халқының болашағы үшін қандай да тәуекелге барып, өз басын бәйгеге тігіп жүрген тұңғыш Президентіміз Нұрсұлтан Назарбаевтың қайталанбас ерлігі, көрегендігі деп айтар едік.
Саммитке қатысушы елдердің басшылары Қазақстан мемлекетінің әлемдік саясатқа өз әсерін тигізіп отырған ықпалды державаға айналғанын мойындауда. Осының бәрі Қазақстан халқы үшін үлкен мәртебе. Бұл оқиғаны жас ұрпақ тәрбиесінде жүрген ұстаздар қауымы да үлкен қуанышпен қабылдадық.
Осындай Орталық Азия өңірінде әлемдік қауымдастықтың назарын өзіне аударып, Саммитті өткізіп отырған біздің Отанымыз — Қазақстан Республикасы өсіп-өркендей берсін!
Әбдуәли СҮЛЕЙМЕН,
№1 қазақ орта мектебінің мұғалімі.
Ырғыз ауданы.
Астана дүние жүзіне танымал болды
Бұл оқиға тәуелсіздік алған Қазақстан мемлекетінің тарихында айрықша орын алады. Астана Саммиті ұлтымыздың мәртебесін асқақтатты. Азия мен Еуропа елдері арасында Астана Саммиті алтын көпір болды. Бейбітшілікті нығайту, экологияны жақсарту, экономиканы өркендету бағытындағы жаһандық мәселелерді ортаға салып, халықаралық маңызды құжаттар қабылданды.
Жер жүзінде қазақ мемлекетінің даңқын тағы бір мәрте паш етіп, әлем алдындағы абройымыздың артуы, әрине, Елбасы Нұрсұлтан Назарбаевтың қажырлы еңбегінің арқасы деп білеміз.
А. СӘРСЕН,
«Нұр Отан» ХДП Байғанин аудандық
филиалы төрағасының орынбасары.
Ел тарихының жаңа беттері ашылды
Тәуелсіздіктің 19 жылы ішінде көптеген жетістіктерге қол жеткіздік. Қазақ елі жер байлығы мен ұтымды жобалардың және Елбасы Нұрсұлтан Назарбаевтың сындарлы саясатының арқасында дамудың даңғыл жолын тапты. Осы бір қысқа кезең ішінде көпұлтты Қазақстан өзін әлемге ұлттық құндылықтарын сақтай отырып, әскери-саяси, экономикалық-экологиялық және адами өлшемдерде әрекет ететін мемлекет ретінде көрсете білді.
Қазақстан тарихының жаңа беттері ашылды. Оның алғашқы парағы 2010 жылы ЕҚЫҰ-ға төрағалық етуімен басталады. Қазақстанның ЕҚЫҰ-ға төрағалығының басты түйіні — Астана Саммиті. Беделді ұйымға төрағалық етудегі жинаған тәжірибеміз, Саммит өткізудегі мәртебеміз біздің болашағымызға да үлкен әсері болмақ, еліміздің саяси-демократиялық дамуына да оң ықпал етеді. Осының барлығы өз тәуелсіздігін алған елімізді басқарып келе жатқан біздің Елбасымыздың сарабдал саясатының іске асқанын білдіреді.
А. ШЕРИПОВА,
КА-168/5 түзеу мекемесі жанындағы
жалпы білім беретін кешкі мектеп
директорының тәрбие ісі жөніндегі орынбасары.
Жем қаласы.
Насихат жұмыстары жүргізілуде
Астана Саммиті халықаралық деңгейдегі тарихи оқиға болып қана қоймай, сөзсіз Қазақстанның одан әрі дамуының жаңа кезеңіне жол ашты. Он бір жыл үзілістен кейін қазақ елінің Елордасында ЕҚЫҰ-ға мүше елдердің басшылары арасында жасалған саяси құжаттардың қабылдануы Елбасы Нұрсұлтан Назарбаевтың көреген саясатының нәтижесі.
Осы күнге дейін салыстырмалы түрде экономикасы, мәдениеті, әскери әлеуеті, білім беру деңгейі дегенде Еуропа елдерін үлгі етіп айтатынбыз.
Әлемдегі түйінді мәселелерді тақырыпқа тиек етіп, төрткүл дүниенің бейбіт заманда өмір сүруін күн тәртібіне арқау еткен Астана Саммитінің маңызы зор. «Нұр Отан» ХДП Шалқар аудандық филиалы мүшелері де Саммит жұмысына осындай баға беріп, оның бағыт-бағдары жайында дөңгелек үстелдер өткізіп, тұрғындар арасында насихаттау жұмысын қолға алуда. Қалай дегенде де Елордамыз Астанада өткен Саммит қазақ елінің абыройын асқақтатқаны сөзсіз.
Гүлсара СЕЙІТОВА,
«Нұр Отан» ХДП Шалқар аудандық
филиалы төрағасының бірінші орынбасары.
Астана саммиті тарихи жиын болды
Ұйымның соңғы саммиті 1999 жылы Ыстамбұлда шақырылса, содан бергі кезеңде ЕҚЫҰ кеңістігінде көптеген өзгерістер болды. Бүгінде сол өзгерістерді жан-жақты талқылап, қарастыратын мезгіл жеткен еді. Бұған Астана Саммиті арқау болды.
Қазақстан Республикасы ЕҚЫҰ-ға төраға ретінде әрі өңірлік көрші ретінде Ауғанстанға айтарлықтай көмек көрсетті. Елбасы Н.Назарбаевтың бастамасымен 1000 ауғандық жас Қазақстанның жоғарғы оқу орындарында білім алуда. Бұл мерзім төрт жылды қамтиды. Білім алған ауғандық мамандар өз елінде мемлекеттік басқару салаларында жұмыс істейді. Ауғанстанда бейбітшілік орнатуға өз үлесін қосады.
Қазақстан, сондай-ақ көршіміз Қырғызстандағы жағдайды тұрақтандыруға зор үлес қосты. ЕҚЫҰ-ға мүше мемлекет басшыларының көпшілігі Қазақстанның Қырғызстандағы этносаралық қақтығыстардың әрі қарай өршімеуіне қосқан үлесін жиында жоғары бағалады. Бұдан бөлек, Қазақстан Республикасы Қырғызстанға көршілес ел ретінде және Ұйымның Іс басындағы төрағасы ретінде қайтарымсыз қаржылай, азық-түлік, отын және құрылыс материалдарын берді. Бұл қаржы мен құрылыс материалдары сәуірдегі төңкеріс кезінде қиратылған, өртелген үйлерді қалпына келтіру үшін қажет еді.
Қазақстанның ЕҚЫҰ-ға төрағалығы барысында аса маңызды мәселелердің бірі — ұзаққа созылған Оңтүстік Кавказ бен Приднестровье жанжалдарын реттеуге ықпал етуі болып табылады. Соңғы бес жылдың ішінде алғаш рет Ұйымның бастамасымен Таулы Қарабақтағы гуманитарлық жағдайларға баға беру үшін халықаралық сарапшылар тобы осы өңірде болды.
ЕҚЫҰ сияқты беделді ұйымның тізгінін Қазақстанға ұстату арқылы әлемдік қауымдастық Елбасы Нұрсұлтан Назарбаевтың әлем алдындағы беделі мен белсенділігін танып, қуаттады. Қазақстан төрағалық еткен бір жылдың ішінде аталмыш ұйымның беделі мен белсенділігі де мейлінше артты. Астана Саммиті Қазақстанның тарихи төрағалығының жарқын көрінісі, жемісті нәтижесі болды.
Құрал БАЙСҰЛТАНҰЛЫ,
Қандыағаш қаласы.
Жетістігімізді мойындады
Бүгінде мемлекетіміздің жүргізіп отырған сыртқы саясаты әлемнің барлық жерлерінде жоғары бағалануда. Көршілес Қырғыз және Таулы Қарабақ, Ауғанстан жерлеріндегі шиеленістің бейбіт шешілуінің өзіне қомақты материалдық көмек көрсетілді. Астана Саммитіне қатысушы шетел мемлекеттері басшылары мен өкілдері Елбасының саясатын қолдап, қазақстандықтардың ынтымақтастығы мен жетістігін мойындады. Тәуелсіздік іргетасы қаланған он тоғыз жыл ішінде қазақ елін күллі әлемге паш етіп, еліміздің қауіпсіздігі мен тұрақтылығын қамтамасыз еткен Елбасының көреген саясатын заңгер ретінде әрқашан қолдаймын. Бұйырса, жаңа 2011 жылы Қазақстан Ислам конференциясына төрағалық еткелі отыр. Мұсылман мемлекеттері арасындағы мәселелерде дұрыс шешімге келуі мен қарама-қайшылықтардың алдын алу, ұлтаралық келісімді нығайтуда да Қазақстан өзін үлгі ретінде көрсете білді.
Қанатын жаңа жайған жас мемлекетіміздің басында тұрған Елбасының арқасында болашаққа деген көзқарасымыз өзгеріп, үнемі қолдау жасап, демеу болуымыз аса міндетті.
Жақсылық ОЛЖАШ,
Мәртөк аудандық сотының төрағасы.
Бетті әзірлеген Арайлым НҰРБАЕВА.